జర్నలిస్టులకు ఇన్సూరెన్స్ కార్డులు పంపిణీ చేసిన మెగాస్టార్ చిరంజీవి

తెలుగు ఫిల్మ్ జర్నలిస్ట్ అసోసియేషన్ (టి ఎఫ్ జె) సభ్యులు అందరికీ ఇన్సూరెన్స్ కార్డులను మెగాస్టార్ చిరంజీవి తన చేతుల మీదుగా పంపిణీ చేసారు. గురువారం సాయంత్రం ప్రసాద్ ల్యాబ్స్ లో జరిగిన కార్యక్రమంలో చిరంజీవి పాల్గొన్నారు. జర్నలిస్టులు అందరికీ కార్డులు అందజేశారు. ఈ కార్యక్రమంలో తెలంగాణ సినిమాటోగ్రఫీ మంత్రి తలసాని శ్రీనివాస్ యాదవ్, ప్రముఖ దర్శకుడు అనిల్ రావిపూడి, మరికొందరు ప్రముఖులు పాల్గొన్నారు.

ఈ సందర్భంగా మెగాస్టార్ జర్నలిస్టులతో తనకున్న అనుబంధాన్ని గుర్తుచేసుకున్నారు. ఆయన మాట్లాడుతూ, “జర్నలిస్టులతో ఉంటే నా బంధువులతో ఉన్న భావన కలుగుతుంది. నా కెరీర్ ప్రారంభంలో, అంటే ప్రాణం ఖరీదు కంటే ముందు నా గురించి ఎవరైనా రాస్తే బాగుంటుంది అని అనుకుంటున్న సమయంలో పసుపులేటి రామారావు గారు నా గురించి ఒక ఆర్టికల్ రాసారు. అది నన్ను ఎంతో కదిలించింది. దాంతో నేను ఆయనకు 100 రూపాయలు ఇవ్వబోగా, ఆయన సున్నితంగా తిరస్కరిస్తూ వద్దు సార్ ఇది నా బాధ్యత అని అన్నారు. ఈ చర్య జర్నలిస్టులపై నాకున్న గౌరవాన్ని అమాంతం పెంచింది. ఇంకా నా కెరీర్ లో విలువైన సలహాలు ఇస్తూ వచ్చిన గుడిపూడి శ్రీహరి, విఎస్ఆర్ ఆంజనేయులు, నందగోపాల్ వంటివారు నుండి నేను ఎంతో నేర్చుకున్నాను. ఆ గౌరవంతోనే ఈరోజు కమిటీ ఆహ్వానిస్తే వచ్చాను. తలసాని శ్రీనివాస్ యాదవ్ గారి సూచన మేరకు ప్రతీ సినిమాకూ లక్ష రూపాయలు టి.ఎఫ్.జె అసోసియేషన్ కు ఇచ్చేలా నేను చూసుకుంటాను. ఈ రోజు హెల్త్ కార్డులు పంపిణీ నా చేతుల మీదుగా జరిగింది. భవిష్యత్తులో ఏ అవసరం వచ్చినా నేను ముందుంటాను,” అని భరోసా ఇచ్చారు.

ఇక మంత్రి తలసాని శ్రీనివాస్ యాదవ్ మాట్లాడుతూ, “సినిమా జర్నలిస్టులు సినిమా ప్రమోషన్స్ లో భాగమవుతారు. వారికి రాజకీయాలు తెలీవు. క్రమశిక్షణతో మెలగడం గొప్ప విషయం. ప్యాండెమిక్ సమయంలో చిరంజీవి గారు జర్నలిస్టుల కష్టసుఖాలు పంచుకున్నారు. నేను కూడా వందల మందికి నిత్యావసరాలు అందజేసాను. ప్రతీ సినిమాకూ లక్ష రూపాయల చొప్పున టి.ఎఫ్.జె అసోసియేషన్ కు ఇస్తే బాగుంటుంది అన్నది నా భావన. నా వంతుగా రేపు ఐదు లక్షల రూపాయలు అందజేస్తాను. ప్రభుత్వం సినిమా రంగానికి చేదోడువాదోడుగా ఉంది. ఎన్నో సంక్షేమ కార్యక్రమాలు ప్రభుత్వ పరంగా చేపడుతున్నాం,” అని తెలిపారు.

ఇంకా ఈ కార్యక్రమంలో అనిల్ రావిపూడి, ఎతికా ఇన్సూరెన్స్ సి.ఓ.ఓ రాజేంద్ర, టి.ఎఫ్.జె అధ్యక్షుడు వి.లక్ష్మి నారాయణ, కోశాధికారి నాయుడు సురేంద్ర, ప్రధాన కార్యదర్శి వై.జె. రాంబాబు, మాట్లాడారు.

తెలుగు ఫిల్మ్ జర్నలిస్ట్ అసోసియేషన్ కొత్తగా ఎన్నికైన బాడీ లిస్ట్

ప్రెసిడెంట్

వి లక్ష్మీనారాయణ

ఉపాధ్యక్షులు

1. ఎం చంద్ర శేఖర్
2. జి శ్రీనివాస్ కుమార్

జనరల్ సెక్రటరీ

వై జె రాంబాబు

జాయింట్ సెక్రటరీలు

1.జి వి రమణ
2. వంశీ కాకా

కోశాధికారి

నాయుడు సురేంద్ర కుమార్

కార్య నిర్వాహక కమిటీ

1. పి రఘు
2. వై రవిచంద్ర
3. జి జలపతి
4. కె ఫణి
5. కె సతీష్
6. రెంటాల జయదేవ్
7. వడ్డి ఓం ప్రకాష్
8. సురేష్ కొండి