మే 31 వరకు లాక్‌డౌన్‌: కొత్త మార్గదర్శకాలివే..

ప్రధాన మంత్రి నరేంద్ర మోడీ ఇటీవలే ‘లాక్‌ డౌన్‌ 4’ గురించి స్పష్టమైన ప్రకటన చేశారు. ఈ రోజు అర్థరాత్రితో మూడో దఫా లాక్‌డౌన్‌ ముగియనున్న దరిమిలా, నాలుగో లాక్‌ డౌన్‌ రేపటి నుంచి అమల్లోకి వస్తుంది. అయితే, నాలుగో లాక్‌డౌన్‌కి సంబంధించి కొన్ని ప్రత్యేక మార్గదర్శకాల్ని కేంద్ర హోంశాఖ విడుదల చేసింది. రెడ్‌ జోన్లు, కంటెయిన్‌మెంట్‌ అలాగే బఫర్‌ జోన్లకు సంబంధించి రాష్ట్రాలకే నిర్ణయాధికారాన్ని కేంద్రం అప్పగించింది.

ఆయా జిల్లాల్లో ఉన్నతాధికారులు ఈ మేరకు నిర్ణయాలు తీసుకుంటాయి కేంద్ర హోంశాఖ జారీ చేసిన కొత్త మార్గదర్శకాల నేపథ్యంలో. మరోపక్క, రెస్టారెంట్లకు తీపి కబురు అందించింది కేంద్రం. పార్శిల్స్‌ వరకు రెస్టారెంట్లు నడుపుకోవడానికి వీలు కల్పించింది కేంద్రం. రాష్ట్రాల మధ్య బస్‌ సర్వీసులకు సంబంధించి ఇరు రాష్ట్రాల అంగీకారంతో నడుపుకోవచ్చని కేంద్రం తన తాజా మార్గదర్శకాల్లో పేర్కొనడం గమనార్హం.

అంటే, తెలంగాణ – ఆంధ్రప్రదేశ్‌ మధ్య బస్‌ సర్వీసులు నడవాలంటే, ఇరు రాష్ట్రాలూ సమ్మతించాలన్నమాట. లేనిపక్షంలో, అంతర్గతంగా ఆయా రాష్ట్రాలు బస్‌ సర్వీసుల్ని నడుపుకోవాల్సి వుంటుంది. మెట్రో రైళ్ళు, విమానాలు నడిచేందుకు కేంద్రం సుముఖత వ్యక్తం చేయలేదు. గ్రీన్‌ మరియు ఆరెంజ్‌ జోన్లలో మాత్రమే వెసులుబాట్లు కల్పించింది కేంద్రం. రెడ్‌ జోన్లలో మాత్రం నిబంధనలు యధాతథంగా కొనసాగుతాయి.

ఇక, సినిమా థియేటర్లకు తీపి కబురు అందలేదు. మతపరమైన కేంద్రాలు.. అంటే దేవాలయాలు, మసీదులు, చర్చిల్లో భక్తులకు అవకాశం లేదు. స్కూళ్ళు, ఇతర విద్యా సంస్థల మూసివేత కొనసాగుతుంది. మే 31 వరకు ఈ నాలుగో దఫా లాక్‌ డౌన్‌ కొనసాగుతుంది. ఇదిలా వుంటే, దేశంలో కరోనా పాజిటివ్‌ కేసులు రోజురోజుకీ పెరిగిపోతున్నాయి. నిన్న ఒక్క రోజే దాదాపు 5 వేల కరోనా పాజిటివ్‌ కేసులు నమోదయిన విషయం విదితమే. ఈ రోజు కూడా అదే స్థాయిలో కొత్త పాజిటివ్‌ కేసులు వుండొచ్చు.