‘పుతిన్ ఓ నియంత. ఉక్రెయిన్ తో రష్యా చేస్తున్న యుద్ధంలో పాల్గొనం. మిత్రదేశాలతో కలిసి నాటో భూభాగంలోని ప్రతి అంగుళాన్నీ కాపాడుకుంటాం. ప్రస్తుత యుద్ధంలో పుతిన్ విజయం సాధించవచ్చేమో కానీ.. దీర్ఘకాలంలో తగిన మూల్యాన్ని చెల్లించుకుంటారు. ఉక్రెయిన్‌కు అమెరికా మద్దతు ఉంటుంద’ని అమెరికా అధ్యక్షుడు జో బైడెన్ అన్నారు. కాంగ్రెస్ సంయుక్త సమావేశంలో ‘స్టేట్ ఆఫ్ ది యూనియన్’ ప్రసంగంలో ఆయన వ్యాఖ్యానించారు. ఇంకా ఆయన మాట్లాడుతూ..
‘రష్యాపై మరిన్ని ఆంక్షల్ని విధిస్తున్నాం. రష్యా విమానాలను అమెరికా గగనతలంపై నిషేధిస్తున్నాం. రష్యా ఆర్ధికవ్యవస్థను స్తంభింపజేస్తాం. ఉక్రెయిన్ ను సులభంగా ఆక్రమించుకోవచ్చని భావించిన పుతిన్ అంచనాలు తలకిందులయ్యాయి. ఉక్రెయిన్ ప్రజలు మనోధైర్యంతో ఢీ కొడుతున్నారు. నియంతల ఆలోచనలతో ప్రపంచానికి ముప్పు పెరుగుతుంది. అందుకే రెండో ప్రపంచ యుద్ధం తర్వాత నాటో కూటమి ఏర్పాటు చేశారు. దానినే పుతిన్ వ్యతిరేకిస్తున్నారు. పక్కా వ్యూహంతో ఉక్రెయిన్ పై యుద్ధానికి దిగారు. పుతిన్ సవాల్ ను ఎదుర్కొనేందుకు అమెరికా సిద్ధంగా ఉంది’ అని అన్నారు.