ట్విట్టర్ కు గట్టి షాక్.. మధ్యవర్తి హోదా రద్దు

కేంద్ర ప్రభుత్వానికి, ప్రముఖ సోషల్ మీడియా సంస్థ ట్విట్టర్ కు మధ్య జరుగుతున్న యుద్ధం తీవ్ర రూపం దాల్చింది. నూతన ఐటీ నిబంధనలు అమలు చేయమని చెప్పినా పెడచెవిన పెట్టిన ట్విట్టర్ కు కేంద్రం గట్టి షాక్ ఇచ్చింది. క్రిమినల్ కేసులు, ఇతరత్రా చర్యల నుంచి రక్షణ కల్పించే ‘మధ్యవర్తి’ హోదాను రద్దు చేస్తున్నట్టు పేర్కొంది. దీంతో ఇకపై తన వినియోగదారుల అభ్యంతరకర పోస్టులకు ట్విట్టర్ కూడా క్రిమినల్ కేసులు, ఇతరత్రా చర్యలు ఎదుర్కోక తప్పదు. కొత్త ఐటీ నిబంధనల మేరకు ట్విట్టర్ ఓ ఫిర్యాదు అధికారిని, ఓ నోడల్ అధికారిని, అనుసంధానకర్తగా మరో ప్రధాన అధికారిని నియమించాల్సి ఉంటుంది. వారు ముగ్గురూ భారత్ లోనే నివసిస్తూ ఉండాలి. అయితే, ఎన్నిసార్లు చెప్పినా ట్విట్టర్ వీటిని పట్టించుకోలేదు. ఈ నేపథ్యంలో ట్విట్టర్ తన మధ్యవర్తి హోదాను కోల్పోయినట్టు కేంద్ర వర్గాలు ప్రకటించాయి. అయితే, దీనిపై ఇంకా అధికారికంగా ఉత్తర్వులు వెలువరించలేదు. ఇలా భారత్ లో మధ్యవర్తి హోదా కోల్పోతున్న సోషల్ మీడియా సంస్థ ట్విట్టర్ ఒక్కటే కావడం గమనార్హం. మరోవైపు తాము భారత్ లో అధికారులను నియమించినట్టు ట్విట్టర్ పేర్కొంది. ఈ వివరాలను ఐటీ మంత్రిత్వశాఖకు త్వరలోనే తెలియజేస్తామని ప్రకటించింది.