బొల్లారం పారిశ్రమికవాడలో భారీ పేలుడు.. మహిళ మృతి

తెలంగాణలోని సంగారెడ్డి జిల్లాలో ఉన్న బొల్లారం పారిశ్రామికవాడలో భారీ పేలుడు సంభవించింది. ఓ ప్రైవేట్ పరిశ్రమలో జరగిన ఈ ఘటనలో ఒక కార్మికురాలు మృతి చెందగా.. మరో ఇద్దరు తీవ్రంగా గాయపడ్డారు. పేలుడు ధాటికి పరిశ్రమ గోడ బీటలు వారి పైకప్పులు లేచిపోయాయి. స్థానికంగా కలకలం రేపిన ఈ ఘటనపై పోలీసులు తెలిపిన వివరాల ప్రకారం.. ఎస్ వైఎస్ ఎలక్ట్రానిక్స్ ప్రైవేటు లిమిటెడ్ సంస్థలో ఈ పేలుడు సంభవించింది. ఆదివారం సాయంత్రం నాలుగున్నర ప్రాంతంలో పరిశ్రమలో కాయిల్స్ వేడి చేస్తున్నారు.

ఈ సమయంలో బ్లాక్ లో ఉష్ణోగ్రత ఒక్కసారిగా పెరిగిపోవడంతో పేలుడు సంభవించింది. గాయపడిన వారిని బాచుపల్లిలోని మమత ఆసుపత్రికి తరలించి వైద్యం అందించారు. అయితే.. ఈ ప్రమాద ధాటికి రాధిక అకే కార్మికురాలు మృతి చెందింది. విజయ్ కుమార్ యాదవ్, అన్వేశ్ అనే కార్మికులు తీవ్రంగా గాయపడ్డారు. మరో ముగ్గురు కార్మికులు స్వల్పంగా గాయపడ్డారు. ప్రస్తుతం వీరికి చికిత్స జరుగుతోంది. ఘటనపై పోలీసులు కేసు నమోదు చేసుకుని దర్యాప్తు చేస్తున్నారు.