రవితేజ ‘డిస్కో రాజా’ మూవీ రివ్యూ 

నటీనటులు: రవితేజ, పాయల్ రాజ్పుత్, నాభ నటేష్, తన్య హోప్
నిర్మాత: రమేష్ తాళ్లూరి
దర్శకత్వం: విఐ ఆనంద్
సినిమాటోగ్రఫీ: కార్తీక్ ఘట్టమనేని
మ్యూజిక్: థమన్ ఎస్
ఎడిటర్‌: శ్రవణ్ కటికనేని
రన్ టైం: 2 గంటల 29 నిముషాలు
విడుదల తేదీ: జనవరి 24, 2020

వరుస ప్లాప్స్ తో సతమతమవుతున్న మాస్ మహారాజ్ రవితేజ తన కంఫర్ట్ జోన్ నుంచి బయటకి వచ్చి క్రియేటివ్ డైరెక్టర్ విఐ ఆనంద్ డైరెక్షన్ లో చేసిన సైన్స్ ఫిక్షన్ థ్రిల్లర్ సినిమా ‘డిస్కో రాజా’.  రవితేజ ద్విపాత్రాభినయం చేసిన ఈ సినిమాలో నభ నటేష్, పాయల్ రాజ్పుత్ లు హీరోయిన్స్ గా నటించారు. రవితేజ కెరీర్లోనే అత్యంత భారీ బడ్జెట్ తో రూపొందిన ఈ సైన్స్ ఫిక్షన్ సినిమా ప్రేక్షకులకి ఎంత వరకూ నచ్చింది? రవితేజకి కావాల్సిన హిట్ ని ఇచ్చిందా లేదా అనేది ఇప్పుడు చూద్దాం..

కథ:

ఓపెన్ చేస్తే.. రవితేజ వాయిస్ ‘గేమ్ ఇప్పుడే మొదలైంది’.. ఇక కథలోకి వెళితే.. ఒక స్నో మౌంటైన్ లో పడి బ్రెయిన్ డెడ్ అయిన వాసు(రవితేజ)ని అక్కడ ఉన్న బయో కెమికల్ ల్యాబ్ వారు తీసుకొచ్చి తనపై ప్రయోగం చేస్తారు. దాంతో వాసు బతుకుతాడు. అక్కడి నుంచి తప్పించుకొని తన గతం, తన వాళ్ళ గురించి తెలుసుకోవడానికి ఒక ఎంపితో పబ్లిక్ లో గొడవ పెట్టుకుంటాడు. దాంతో వాసుకి కావాల్సిన వాళ్ళతో పాటు చెన్నైకి చెందిన రౌడీ సేతు(బాబీ సింహా) కూడా వాసుని వేసెయ్యడానికి వస్తాడు. దానికి కారణం వాసుకి డిస్కో రాజ్ కి సంబంధం ఉందనుకోవడం. ఇక అక్కడి నుంచి కథ ఎన్ని మలుపులు తిరిగింది? ఇంతకీ ఈ డిస్కో రాజ్ ఎవరు? డిస్కో రాజ్ కి వాసు కి ఉన్న గొడవలు ఏమిటి? అసలు వాసుని ఎవరు మౌంటైన్స్ లో పడేసింది? ఇంతకీ ఆ బయో కెమికల్ ల్యాబ్ లో జరిగిన ప్రయోగం ఏమిటి? దాని వలన వాసు పడిన ఇబ్బందులేమిటి? ఇలాంటి అన్ని సమాధానాల సమూహారమే ‘డిస్కో రాజా’.

తెర మీద స్టార్స్..

డిస్కో రాజ్ గా రవితేజ నటన ఎలా ఉంది అంటే.. గత్తరలేపినవ్..  చింపేసినవ్ పో అని చెప్పాలి. డిస్కో రాజ్ గా యాటిట్యూడ్, మ్యానరిజమ్స్, డైలాగ్ మాడ్యులేషన్, స్టెప్స్ సింప్లీ సూపర్బ్.. స్పెషల్ గా ఇంగ్లీష్ లో చూపిన కొన్ని కొన్ని డైలాగ్స్ ఇక అందరినోటా మారుమ్రోగుతాయ్.  వాసు పాత్రలో కూడా మెప్పించాడు. ఒక్క మాటలో చెప్పాలంటే రవితేజ కోసం, రవితేజ మాత్రమే చేయగలిగిన పాత్ర డిస్కో రాజ్ అని చెప్పడంలో ఎలాంటి అతిశయోక్తి లేదు. పేరుకి ఇందులో ముగ్గురు హీరోయిన్స్ ఉన్నప్పటికీ కథకి అవసరమున్న పాత్రలో కనిపించింది మాత్రం పాయల్ రాజ్ పుత్. తను వింటేజ్ స్టైల్లో చాలా బాగుంది, అలాగే తన పాత్రలో చాలా బాగా చేసింది. నభ నటేష్ కి పెద్ద పాత్ర లేదు, ఉన్నంతలో ఓకే. ఇక సైంటిస్ట్ గా తన్య హోప్ ఉన్నంతలో బాగా చేసింది. తన్య హోప్ – వెన్నెల కిషోర్ మధ్య సీన్స్ కొన్ని నవ్వులు పూయిస్తాయి.

ఇకపోతే రవితేజకి ధీటుగా పెర్ఫార్మన్స్ తో సూపర్బ్ అని విజిల్స్ వేయించుకున్న నటుడు బాబీ సింహా. నెగటివ్ షేడ్స్ లో అదరగొట్టాడు. అలాగే మరో సర్ప్రైసింగ్ పెర్ఫార్మన్స్ అంటే సునీల్ దని చెప్పాలి. అటు కామెడీ, ఇటు నెగటివ్ షేడ్స్ ఉన్న పాత్రలో మరియు వాయిస్ లో అద్భుతమైన వేరియేషన్స్ చూపించాడు. సునీల్ కి నటుడిగా మరో టర్నింగ్ పాయింట్ ఈ సినిమా అని చెప్పుకోవాలి. రాంకీ, సత్య మిగిలిన నటీనటులు ఉన్నంతలో బాగానే చేశారు.

 
తెర వెనుక టాలెంట్..

డైరెక్టర్ విఐ ఆనంద్ అనుకున్నదానికంటే ఎక్కువగా, అద్భుతమైన వర్క్ తో మెప్పించిన వారు ముగ్గురు ఉన్నారు. వాళ్ళే మ్యూజిక్ డైరెక్టర్ థమన్, సినిమాటోగ్రాఫర్ కార్తీక్ ఘట్టమనేని అండ్ ఆర్ట్ డైరెక్టర్ శ్రీనాగేంద్ర తంగల. కార్తీక్ విజువల్స్ అండ్ సెట్స్ సినిమాలో పూర్తిగా లీనమయ్యేలా చేస్తే థమన్ బ్యాక్ గ్రౌండ్ మ్యూజిక్ నెక్స్ట్ లెవల్ కి తీసుకెళ్లింది. ముఖ్యంగా డిస్కో రాజ్ పాత్ర కోసం వీళ్ళు తీసుకున్న కేరింగ్ వల్లే ఆన్ స్క్రీన్ వండర్ఫుల్ గా అనిపిస్తుంది. సాంగ్స్ ఎంత హిట్ అయ్యాయో విజువల్ గా అంతకు మించి ఉండేలా షూట్ చేశారు. ఇక అబ్బూరి రవి డైలాగ్స్ బాగున్నాయి. మరీ రవితేజ గత సినిమాల్లాంటి మాస్ డైలాగ్స్ కాదు, కానీ మాస్ అనిపించేలా డిస్కో రాజ్ పాత్రకి డైలాగ్స్ రాసారు. ఇక ఎడిటర్ శ్రవణ్ కటికనేని ఓవరాల్ గా ఓకే అనిపించినా అక్కడక్కడా కొంతవరకూ కత్తెర వేసి ఉండచ్చు. బోరింగ్ సీన్స్ ఎక్కువైనప్పుడు ఆయన మాత్రం ఏం చేయగలడు.

ఇక కెప్టెన్ అఫ్ ది షిప్ విఐ ఆనంద్ విషయానికి వస్తే.. రెగ్యులర్ కమర్షియల్ కథలకి ఏదో ఒక కొత్త పాయింట్ ని జత చేసి ఇది కమర్షియల్ కథ కాదు అని కలర్ కోటింగ్ ఇచ్చి చెప్పడం విఐ ఆనంద్ ట్రిక్.. అదే ట్రిక్ ని ఇక్కడా ఫాలో అయ్యాడు. అందరికీ సైన్స్ ఫిక్షన్ కథ అని చెప్పి ఒక రెగ్యులర్ రివెంజ్ డ్రామాని చెప్పారు. అలా అని సైన్స్ ఫిక్షన్ టచ్ చేయలేదని కాదు, టచ్ చేసి మరీ రెగ్యులర్ కాదులే అనిపించి వదిలేసాడు. ‘ది ఏజ్ ఆఫ్ అడలిన్’ అనే కథలోని కీ పాయింట్ ని ఇక్కడ సైన్స్ ఫిక్షన్ ద్వారా చెప్పాడు. కానీ అంత డిఫరెంట్ అండ్ యూనిక్ పాయింట్ ని ఎంచుకోవడంలో, డిస్కో రాజ్ పాత్రని  కొత్తగా డిజైన్ చేసుకోవడంలో సక్సెస్ అయ్యాడు కానీ కథని మాత్రం అదే పాత పద్దతిని ఫాలో అయ్యాడు. దాంతో దెబ్బైపోయాడు. సినిమాలో డిస్కో రాజ్ పాత్ర కనిపిస్తున్నంత సేపు సినిమా ఫుల్ ఎనర్జీగా ఉంటుంది, అదే లేకపోతే గాలి తీసేసిన బెలూన్ లా తుస్ అంటూ చాలా బోరింగ్ గా అనిపిస్తుంది. ఫ్లాష్ బ్యాక్ లో డిస్కో రాజ్ తో క్రియేట్ చేసిన మేజిక్ ని ప్రెజంట్ డిస్కో రాజ్ పాత్రలో చూపించలేకపోవడం మరో మైనస్. స్క్రీన్ ప్లే లో దాదాపు 20 నిమిషాలు చెప్పే సైన్స్ ఫిక్షన్ విషయానికి కథలో పెద్ద ఉపయోగం లేకపోవడం వలన ఇంతోటి కథకి స్టార్టింగ్ లో అంత సోది ఎందుకు చెప్పారబ్బా అనుకుంటారు. ఫస్ట్ హాఫ్ స్లోగా మొదలవుతుంది తర్వాత పికప్ అవుతుంది, ఇంటర్వల్ కి పీక్స్ కి వెళ్లి సెకండాఫ్ లో కొద్దిసేపు ఆ టెంపో కంటిన్యూ అవుతుంది. ఇక అక్కడి నుంచి డ్రాప్ అవుతుంది. అలాగే కథలో మెయిన్ విలన్స్ అయిన ఇద్దరికీ సరైన లక్ష్యం ఉండదు. అందుకే బాబీ సింహా, సునీల్ అద్భుతమైన పెర్ఫార్మన్స్ కనబరిచిన పాత్రల్లో డెప్త్ లేక విలనిజం పెద్ద కిక్ ఇవ్వలేదు. విఐ ఆనంద్ డైరెక్టర్ గా 50-50 అని చెప్పాలి. రామ్ తాళ్లూరి ప్రొడక్షన్ డిజైనింగ్ మాత్రం విజువల్ వండర్ అనిపించుకుంది.

విజిల్ మోమెంట్స్:  

– డిస్కో రాజ్ గా రవితేజ పెర్ఫార్మన్స్ అదిరింది.
– ఇంటర్వల్ బ్లాక్
– సెకండాఫ్ మొదటి 30 నిముషాలు
– బాబీ సింహా పెర్ఫార్మన్స్
– చిరు కటౌట్ సీన్స్
– థమన్ మ్యూజిక్
– కార్తీక్ ఘట్టమనేని విజువల్స్

బోరింగ్ మోమెంట్స్: 

– పేరుకే సైన్ ఫిక్షన్ కథ మాత్రం పరమ రొటీన్
– బోరింగ్ స్క్రీన్ ప్లే
– సెకండాఫ్ లో సెకండ్ పార్ట్ బాగా వీక్ అవ్వడం
– విలనిజంలో దమ్ము లేకవడం
– కామెడీ లేకపోవడం
– రవితేజ అభిమానులు కోరుకునే అంశాలు తక్కువ కావడం.
– వృధా అయినా గుడ్ కాన్సెప్ట్

విశ్లేషణ: 

సైన్స్ ఫిక్షన్ సినిమా, సెటప్స్, హాలీవుడ్ టెక్నీషియన్స్, గ్రాఫిక్స్ అవీ ఇవీ అని చెప్పుకుంటూ వచ్చిన ‘డిస్కో రాజా’ సినిమాలో టైటిల్ రోల్ అయిన డిస్కో రాజ్ పాత్ర మాత్రమే మెప్పించింది, మిగతా అంతా సర్వ మంగళ మేళమే అన్నట్లు ఉండడంతో ప్రేక్షకులు నిరాశపడతారు. మొదలు పెట్టిన సూపర్బ్ సైన్స్ ఫిక్షన్ పాయింట్ ని పక్కన పడేసి రొటీన్ పంథాలో కథని తీసుకెళ్ళడం బోరింగ్ గా అనిపిస్తుంది. డిస్కో రాజ్ పాత్రని రవితేజ అభిమానులు, సినీ ప్రేక్షకులు సూపర్బ్ ఎంజాయ్ చేస్తారు, కానీ అది సినిమాలో ఓవరాల్ గా గంట మాత్రమే ఉంటుంది, మిగతా దానిలో పెద్దగా మ్యాటర్ లేకపోవడం వలన ప్రేక్షకులు నిరాశతోనే బయటకి వస్తారు. ఓవరాల్ గా రవితేజ తన పంథా మార్చి చేసిన ఈ సినిమాలో డిస్కో రాజ్ గా కొంతవరకూ మెప్పించిన, అయన నుంచి కోరుకునే కామెడీ, మాస్ ఎలిమెంట్స్ లాంటివి మిస్ అవ్వడం వలన యావరేజ్ బొమ్మ ‘డిస్కో రాజా’ అనే టాక్ ని తెచ్చుకుంటుంది.

ఇంటర్వల్ మోమెంట్: ఇంటర్వల్ బ్లాక్ అదిరింది, కమాన్ డిస్కో రాజా సెకండాఫ్ కుమ్మేసుకుందాం.!

ఎండ్ మోమెంట్: పైన పటారం.. లోన లొటారం..!

చూడాలా? వద్దా?: రవితేజ ఫాన్స్ ఒకసారి చూడచ్చు.!

బాక్స్ ఆఫీస్ రేంజ్:

డిస్కో రాజ్ గా రవితేజ మెప్పించినప్పటికీ, మిగతా రెండు పాత్రలు పెద్దగా ఆకట్టుకోకపోవడం వలన ‘డిస్కో రాజా’ సినిమాకి సినీ ప్రేక్షకుల నుంచి యావరేజ్ టాక్ వస్తుంది. కానీ సంక్రాంతి తర్వాత సినిమాలు లేకపోవడం, సోలో రిలీజ్ కావడం, ఇప్పటికే ఆన్ లైన్ బుకింగ్ చాలా వరకూ అవ్వడం వలన తెలుగులో ఈ వీకెండ్ మంచి  కలెక్షన్స్  రాబట్టుకోవచ్చు. కానీ సోమవారం నుంచి కాస్త టఫ్ అవుతుంది. వీక్ డేస్ లో కంప్లీట్ డ్రాప్ అయితే మాత్రం 22 కోట్ల పైన షేర్ సాధించడం అనేది కష్టతరం అవుతుంది.

గమనిక: మా బాక్స్ ఆఫీస్ రేంజ్ అనేది సినిమా రేటింగ్ మీదే పూర్తిగా డిపెండ్ అవ్వకుండా హీరో స్టార్డం, భారీ రిలీజ్ మరియు రిలీజ్ అయిన సీజన్ ని కూడా కలుపుకొని చెబుతాం.

తెలుగుబుల్లెటిన్.కామ్ రేటింగ్: 2.5/5