వైఎస్‌ జగన్‌ దూకుడు.. జనం ఏమనుకుంటున్నారంటే..

మొన్న కృష్ణా నదికి వరదలొచ్చాయ్‌.. అప్పుడే, రాష్ట్రంలో రాజధాని చుట్టూ బురద రాజకీయం షురూ అయ్యింది. ఈ మధ్యనే అసెంబ్లీ సాక్షిగా మూడు రాజధానుల ప్రస్తావనను ముఖ్యమంత్రి వైఎస్‌ జగన్‌ తీసుకొచ్చాక, రాజధాని చుట్టూ రాజకీయం ముదిరి పాకాన పడింది. జీఎన్‌ రావు కమిటీ, బోస్టన్‌ కన్సల్టెన్సీ గ్రూప్‌.. చివరికి హై పవర్‌ కమిటీ.. ఇవన్నీ ఓ ప్రసహనం మాత్రమే. రాష్ట్రంలో మూడు రాజధానుల దిశగా వైఎస్‌ జగన్‌ ఎప్పుడో నిర్ణయం తీసేసుకున్నారు.. దాన్ని ఇప్పుడు అమలు చేసేయాలనుకుంటున్నారు.

‘రాష్ట్రంలో ప్రజలంతా అభివృద్ధిని కోరుకుంటున్నారు.. ఈ క్రమంలోనే మా నిర్ణయాల్ని స్వాగతిస్తున్నారు..’ అని ముఖ్యమంత్రి జగన్‌ చెప్పుకున్నారు. అభివృద్ధి వికేంద్రీకరణ వేరు, పాలనా వికేంద్రీకరణ వేరు. ఆ విషయం ప్రజలకు అర్థమయ్యింది.. ప్రభుత్వంలో వున్నవారికీ అసలు కథేంటో తెలుసు. అందుకే, శాసన మండలిలో తెలుగుదేశం పార్టీ తన ప్రతాపం చూపినా, ఎక్కడా చంద్రబాబు పట్ల వ్యతిరేకత రాలేదు. ‘పెయిడ్‌ ఆర్టిస్టుల్ని’ పెట్టి మరీ తెలుగుదేశం పార్టీకి చెందిన నేతల ఇళ్ళ మీదకి అధికార పార్టీ దండయాత్రలకు సిద్ధమవుతోంది తప్ప.. జనం అసలు ఈ విషయాన్నే పట్టించుకోవడంలేదు.

లేకపోతే, రాయలసీమతోపాటు ఉత్తరాంధ్రలో తెలుగుదేశం పార్టీకి ప్రజా నిరసనల తాలూకు సెగ ఓ స్థాయిలో వుండేది. తాజా పరిణామాల్ని వైఎస్‌ జగన్‌ కాస్త తెలివిగా అర్థం చేసుకోవాలి. పరిస్థితుల్ని అధ్యయనం చేసుకోవాలి. ఒక్క రాజధానిని మూడు ముక్కలు చేసేసి, తద్వారా మూడు ప్రాంతాల్ని అభివృద్ధి చేసేస్తానంటే అది జరగని పని.. అని రాష్ట్ర ప్రజానీకానికి ఓ అవగాహన వచ్చేసింది.

పైగా, అమరావతిని ముక్కలు చేసినోడు, రేప్పొద్దున్న.. రాష్ట్రాన్ని ముక్కలు చేయడన్న గ్యారంటీ ఏంటి.? అనే చర్చ కూడా షురూ అయ్యింది. మూడు రాజధానులు – అభివృద్ధి వికేంద్రీకరణ – పాలనా వికేంద్రీకరణ అనే ఆలోచనలు చేసినప్పుడు, తొలుత ఆ ఆలోచనల్ని ప్రజలతో పంచుకోవాలి విజ్ఞత గల రాజకీయ పార్టీ ఏదైనా. అది మానేసి, దూకుడు ప్రదర్శించడం వల్లే ఈ దుస్థితి.