ఇన్‌సైడ్‌ స్టోరీ: వైసీపీలో టీడీపీ కోవర్టులున్నారా.?

రాజకీయాలన్నాక కోవర్టులు సర్వసాధారణం. ఈ మధ్య ఆ కోవర్టు వ్యవహారాలు మరింత గట్టిగా జరుగుతున్నాయి. పార్టీ ఫిరాయింపుల దగ్గర్నుంచి చాలా విషయాలు ఈ కోవర్టుల రాజకీయాల చుట్టూనే జరుగుతుంటాయి. అలాంటి కోవర్టుల కారణంగానే శాసన మండలిలో అధికార వైఎస్సార్‌ కాంగ్రెస్‌ పార్టీకి ఎదురు దెబ్బ తగిలిందా.? ఈ విషయమై వైఎస్సార్సీపీలో అంతర్గతంగా చాలా సీరియస్‌గా చర్చ జరుగుతోందట.

‘చాలా ముఖ్యమైన విషయాల్ని, చాలా సిల్లీగా లైట్‌ తీసుకున్నాం.. అదే ఇప్పుడు కొంప ముంచింది..’ అని ఓ ముఖ్య నేత ఒకరు ముఖ్యమంత్రి వైఎస్‌ జగన్‌ దృష్టికి తీసుకెళితే, ‘మరి, ఆ విషయం ముందే ఎందుకు చెప్పలేదు.?’ అని వైఎస్‌ జగన్‌, సదరు ముఖ్య నేతని నిలదీశారట.

మరోపక్క, పార్టీలో వైఎస్‌ జగన్‌ వద్దకు ఏ విషయాన్ని అయినా తీసుకెళ్ళాలంటే, కొన్ని శక్తులు అడ్డుపడుతున్నాయంటూ పార్టీలో సీనియర్‌ నేతలే ఆఫ్‌ ది రికార్డ్‌గా తమ సన్నిహితుల వద్ద వాపోతున్నారు. నెల్లూరు జిల్లాకి చెందిన ఓ ‘రెడ్డిగారు’, తాను మొదటి నుంచీ జగన్‌ వెంటే వున్నా, తనను కాదని ఈ మధ్యనే వైసీపీలోకి వచ్చిన నేతలకి పదవులిచ్చారంటూ వాపోయిన విషయం విదితమే.

ఒకప్పుడు జగన్‌ని తిట్టినవాళ్ళే ఇప్పుడు ఆయన చుట్టూ కోటరీగా ఏర్పడి, కోవర్టు రాజకీయాలు చేస్తున్నారని సదరు ‘రెడ్డి’గారు మాత్రమే కాదు, చాలామంది అభిప్రాయపడుతున్నారట. అయితే, ఈ విషయాల్ని బాహాటంగా చెప్పేందుకు మాత్రం ఎవరూ సాహసించడంలేదు. ఎందుకంటే, వైఎస్సార్సీపీకి సంఖ్యా బలం తిరుగులేని రేంజ్‌లో వుంది. పైకి పెదవి విరిస్తే.. రాజకీయ భవిష్యత్తు ప్రశ్నార్థకమవుతుందన్నది వారి వాదన.

‘జగన్‌కి ఇదొక హెచ్చరిక.. ప్రభుత్వం ఓడిపోవడమంటే అంతకన్నా అవమానకరం ఇంకోటుండదు.. కోవర్టులపై దృష్టిపెట్టాల్సిందే..’ అని వైఎస్‌ జగన్‌ మోహన్‌రెడ్డికి అర్థమయ్యేలానే సదరు సీనియర్లు, సమాచారాన్ని రకరకాల మార్గాల్లో అధినేత వద్దకు చేర్చే ప్రయత్నమైతే చేస్తున్నారట.