6గురు నిందితుల్లో 5గురు మైనర్లే.. జూబ్లీ హిల్స్ గ్యాంగ్ రేప్ పై సీపీ ప్రెస్ మీట్..

జూబ్లీహిల్స్ లో బాలికపై సామూహిక అత్యాచార ఘటనలో సమగ్ర దర్యాప్తు చేశామని నగర పోలీస్ కమిషనర్ సీవీ ఆనంద్ తెలిపారు. ఈకేసులో నిందితులు మొత్తం ఆరుగురిలో ఒకరు మేజర్ కాగా మిగిలిన ఐదుగురు మైనర్లేనని తెలిపారు. మేజర్ పేరు సాదుద్దీన్ మాలిక్ కాగా.. మైనర్లు అయినందున వారి పేర్లు వెల్లడించేందుకు వీల్లేదని అన్నారు. ఘటనకు సంబంధించిన వివరాలను సీపీ మీడియాకు వివరించారు.

బెంగళూరు నుంచి మొదలు..

‘మార్చి 28న బెంగళూరులో నివసించే ఓ విద్యార్ధి పాఠశాలల ప్రారంభానికి ముందు పార్టీ చేసుకోవాలని పబ్ విషయమై ముగ్గురు స్నేహితులను సంప్రదించాడు. వారు అమ్మేసియా పబ్ ను సూచించడంతో నాన్ ఆల్కహాలిక్, నాన్ స్మోకింగ్ పార్టీ కోసం పబ్ బుక్ చేశారు. అందరూ మైనర్లు కావడంతో మేజర్ అయిన ఉస్మాన్ ఆలీఖాన్ తో పబ్ బుక్ చేయించారు. మే 28న పార్టీ డేట్ ఫిక్స్ చేసుకున్నారు. మే 25న బెంగళూరు నుంచి వచ్చిన అబ్బాయి పబ్ లో రూ.1లక్ష అడ్వాన్స్ ఇచ్చారు. స్నేహితుల ద్వారా బాధితురాలు టికెట్ బుక్ చేసుకుంది’.

పార్టీ జరిగిన రోజు..

పార్టీ జరిగిన రోజు మధ్యాహ్నం 1.10 గంటలకు బాధితురాలితోపాటు బాలుడు పబ్ లోకి వెళ్లారు. 1.50 వరకూ డ్యాన్స్ చేసిన అనంతరం బాలుడు వెళ్లిపోయాడు. మరో స్నేహితురాలితో బాలిక అక్కడే ఉంది. 3.15 గంటలకు 5.10 గంటలకు నిందితుల్లో ఒకరు, సాదుద్దీన్ బాలికతో మాటలు కలిపి అసభ్యంగా ప్రవర్తించారు. దీంతో 5.40 గంటలకు బాలిక, ఆమె స్నేహితురాలు పబ్ నుంచి బయటకు వచ్చేశారు. ఇది గమనించిన మిగిలిన నిందితులు బాలికను ఫాలో అయ్యారు. అత్యాచారం చేయాలనే ఆలోచన కూడా అప్పుడే వచ్చినట్టు తెలుస్తోంది. బాధితురాలి స్నేహితురాలు క్యాబ్ లో వెళ్లిపోయింది.

బాలికను ట్రాప్ చేసి సాదుద్దీన్ తోపాటు ముగ్గరు మైనర్లు ఆమెను బెంజి కార్లో తీసుకెళ్లారు. అక్కడి నుంచి బేకరీకి వెళ్లారు. కారులోనే ఆమెతో అసభ్యంగా ప్రవర్తించారు. 5.54 తర్వాత బెంజి నుంచి ఇన్నోవాలోకి మారాక.. అందులో సాదుద్దీన్ మాలిక్, ఐదుగురు మైనర్లు వెళ్లారు. రోడ్ నెంబర్ 44లో ఓచోట ఆపి మైనర్ ఆమెపై అత్యాచారం చేశాడు. మిగిలిన నిందితులు కారులో తిరుగుతూ అత్యాచారం చేశారు. ఈక్రమంలో ఆమె మెడ, ఇతర శరీర భాగాలపై గాయాలయ్యాయి., ఘటన తర్వాత ఆమెను పబ్ వద్ద దించేసి వెళ్లిపోయారు.

మూడు రోజుల తర్వాత..

తండ్రికి ఫోన్ చేయడంతో వచ్చి ఆమెను ఇంటికి తీసుకెళ్లారు. మూడు రోజుల తర్వాత గాయాలు చూసి పోలీసులకు ఫిర్యాదు చేయగా పోక్సో చట్టం కింద కేసు నమోదు చేశాం. 1న కేసు నమోదు చేసి 3వ తేదీన సాదుద్దీన్ ను అరెస్టు చేశాం. సాదుద్దీన్ తోపాటు నలుగురు మైనర్లు ఆమెపై అత్యాచారం చేశారు. మరో మైనర్ అత్యాచారం చేయలేదు. బలమైన ఆధారాల సేకరణ వల్ల కొంత ఆలస్యమైంది. నిందితులపై పెట్టిన సెక్షన్ల ప్రకారం జీవితఖైదు లేదా మరణశిక్ష పడే అవకాశం ఉంది. అత్యాచారం చేయకపోయినా కారులో ఆమెను ముద్దాడిన ఐదో మైనర్ కు 5-7 ఏళ్ల వరకూ శిక్ష పడే అవకాశం ఉంది. ఘటనను వీడియోలు తీసీ వాళ్లే సోషల్ మీడియాలో పోస్ట్ చేశారు. ఇకపై పోలిస్ క్లియరెన్స్ ఇచ్చాకే పబ్ లకు అనుమతి ఇచ్చేలా చర్యలు తీసుకుంటాం’ అని సీపీ సీవీ ఆనంద్ తెలిపారు.