కరోనా కబళించేస్తున్నా.. ఏం ఫర్లేదు.. ఆల్‌ ఈజ్‌ వెల్‌.!

రోజువారీ నమోదవుతున్న కేసుల సంఖ్య 27 వేలు దాటేసింది. ముందు ముందు రోజుకి లక్షన్నర, ఆ పైన కేసులు నమోదయినా ఆశ్చర్యపోనక్కర్లేదంటూ కొన్ని ‘నివేదికల్ని’ మీడియాలో చూస్తున్నాం. అయినాగానీ, కోలుకుంటున్నవారి సంఖ్య ఎక్కువవుతుండడం, మరణాల రేటు తక్కువగా నమోదవుతుండడంతో ‘ఆల్‌ ఈజ్‌ వెల్‌’ అంటోంది కేంద్రం. దేశంలో చాలా ప్రాంతాల్లో ‘కాంటాక్ట్‌’ తెలియకుండానే కరోనా పాజిటివ్‌ కేసులు నమోదవుతున్నాయి. కానీ, దేశంలో ఎక్కడా ‘సామాజిక వ్యాప్తి కన్పించడంలేదు’ అని కేంద్రం చెబుతుండడం అందర్నీ విస్మయానికి గురిచేస్తోంది.

మరోపక్క, దేశ ఆర్థిక వ్యవస్థ క్రమక్రమంగా గాడిన పడే సూచనలు కన్పిస్తున్నాయట. ‘కమర్షియల్‌ యాక్టివిటీ’ సాధారణ స్థాయికి చేరుకుంటోందని అటు కేంద్రం, ఇటు రాష్ట్రాలు చెబుతుండడం ఆహ్వానించదగ్గ విషయమే. ఇదంతా నాణానికి ఓ వైపు మాత్రమే. కరోనాతో మృతి చెందినవారి పార్తీవ దేహాలకు అంత్యక్రియలు జరుగుతున్న తీరు అత్యంత బాధాకరం. అన్ని కేసుల్లోనూ కాకపోవచ్చు, కొన్ని కేసుల్లో అయినా.. ఇది అత్యంత అమానవీయం. జేసీబీలు ఉపయోగించి మృతదేహాల్ని ఖననం చేయడాన్ని ఎలా అర్థం చేసుకోవాలి.? ఈ క్రమంలో మృతదేహాల్ని ‘విసిరి పారేస్తున్న’ వైనాన్ని సభ్య సమాజం హర్షించదు. పైగా, ‘ఇలాంటి మరణం మాకు రాకూడదు మొర్రో..’ అంటూ కొందరు ‘కరోనా అనుమానం’తో బలవన్మరణాలకు పాల్పడుతున్నారు. ‘కరోనా వచ్చినా భయపడాల్సిన అవసరం లేదు. సాధారణ ఫ్లూ జ్వరంతో కూడా చాలామంది చనిపోతుంటారు. దాంతో పోల్చితే, కరోనా మరణాలు ఎక్కువేం కాదు. భయంతోనే ఎక్కువమంది చనిపోతున్నారు..’ అంటూ ప్రముఖ వైద్యుడొకరు చెబుతున్నారు. కానీ, ఈ దిశగా ప్రభుత్వాలు ప్రజల్లో అవగాహన కల్పించలేకపోతున్నాయి.

మృతదేహాల అంత్యక్రియల విషయంలో ప్రభుత్వ వైఫల్యం సుస్పష్టం. బాధిత కుటుంబాలకు మృతదేహాలు అప్పగించడంలోనూ ప్రభుత్వాలు ‘పద్ధతి’గా వ్యవహరించడంలేదు. పరిస్థితి ఇంత తీవ్రంగా వుంటే ‘ఆల్‌ ఈజ్‌ వెల్‌’ అని ఎలా అనగలం.? ఆర్థిక వ్యవస్థ గాడిన పడిపోతే సరిపోదు.. ‘మానవత్వం’ నాశనమైపోతోంది సమాజంలో కరోనా వైరస్‌ కారణంగా.