ఇన్‌సైడ్‌ స్టోరీ: ‘పితాని’ అరెస్ట్‌ తప్పదా.?

మాజీ మంత్రి పితాని సత్యనారాయణ తనయుడు పితాని సురేష్‌ కోసం ఏపీ ఏసీబీ తీవ్రంగా గాలిస్తోంది. ఏ క్షణాన అయినా ఆయన్ని ఏసీబీ అదుపులోకి తీసుకోవచ్చన్న ప్రచారం జరుగుతోంది. ఈఎస్‌ఐ మెడికల్‌ స్కాంకి సంబంధించి ఇప్పటికే మాజీ మంత్రి అచ్చెన్నాయుడు సహా పలువుర్ని ఏసీబీ అరెస్ట్‌ చేసిన విషయం విదితమే. నిన్న పితాని సత్యనారాయణ మాజీ సీఎస్‌ మురళీమోహన్‌ని ఏసీబీ అదుపులోకి తీసుకుంది. ఆయన్ని మెజిస్ట్రేట్‌ ముందు హాజరు పర్చడం, 14 రోజులు ఆయనకు రిమాండ్‌ విధించడం చకచకా జరిగిపోయాయి. ఈఎస్‌ఐ మెడికల్‌ స్కాంకి సంబంధించి మురళీమోహన్‌ పాత్రపై ఏసీబీ దగ్గర పక్కా ఆధారాలు వున్నాయట. ఈ ఆధారాల్లో పితాని సురేష్‌ వ్యవహారం కూడా బయటపడిందంటూ ఇటు రాజకీయ వర్గాల్లోనూ, అటు మీడియా వర్గాల్లోనూ చర్చ జరుగుతోంది.

మరోపక్క, మాజీ మంత్రి పితాని సత్యనారాయణ కూడా ఈ కేసులో అడ్డంగా ఇరుక్కుపోయారనీ, పితాని సురేష్‌ తర్వాతి అరెస్ట్‌ పితాని సత్యనారాయణదేనంటూ అధికార పార్టీ పరోక్షంగా సంకేతాలు పంపుతోంది. ‘ఇది చిన్న స్కాం కాదు.. చాలా చాలా పెద్దది..’ అంటోంది అధికార పక్షం. అందుకు తగ్గట్టుగానే అరెస్టుల పర్వం నడుస్తోంది. మరోపక్క, తెలుగుదేశం పార్టీ మాత్రం ‘ఇదంతా కక్ష సాధింపు చర్యల్లో భాగం. అచ్చెన్నాయుడికి ఈ కేసుతో సంబంధం లేదు.. టీడీపీ ముఖ్య నేతల్ని ఇరకాటంలో పెట్టేందుకే అడ్డగోలు ఆరోపణలు..’ అంటోంది.

ఎవరి వాదనలు ఎలా వున్నా, ‘నాకేంటి సంబంధం.?’ అంటూ గతంలో బుకాయించిన అచ్చెన్నాయుడు ఇప్పటికే అరెస్టయ్యారు.. ‘నాకేంటి సంబంధం.?’ అని ఇప్పటిదాకా చెబుతోన్న పితాని సత్యనారాయణ కూడా అరెస్టయ్యే పరిస్థితులు కన్పిస్తున్నాయి. ముందస్తు బెయిల్‌ కోసం ఇప్పటికే న్యాయస్థానాన్ని ఆశ్రయించిన పితాని సురేష్‌, కోర్టు నుంచి ఉపశమనం దొరికేదాకా ‘అజ్ఞాతం’ వీడకపోవచ్చునట. కానీ, ఏసీబీ మాత్రం.. ఈ కేసుని అత్యంత ప్రతిష్టాత్మకంగా తీసుకున్నట్లే కన్పిస్తోంది.