విద్యుత్, బొగ్గు అంశాలపై సీఎం జగన్ ఉన్నతస్థాయి సమీక్ష

రాష్ట్రంలో కరెంటు పరిస్థితులపై అధికారులతో సీఎం వైఎస్‌ జగన్‌ సమీక్ష నిర్వహించారు. రాష్ట్రానికి బొగ్గు సరఫరా, విద్యుత్‌ కొరత రాకుండా అమలు చేస్తున్న అత్యవసర ప్రణాళికలు, దీర్ఘకాలిక వ్యూహాలపైనా సీఎం నిశితంగా సమీక్ష నిర్వహించారు. రాష్ట్రంలో ఎలాంటి అవాంతరాలు లేకుండా నిరంతరాయంగా కరెంటు సరఫరా చేస్తున్నామని అధికారులు సీఎంకు తెలిపారు. ఎప్పటికప్పుడు పరిస్థితులను బేరీజు వేసుకుని తగిన ప్రణాళికలతో ముందుకు వెళ్తున్నామని అధికారులు వివరించారు.

ఈ సందర్భంగా మహానది కోల్‌ఫీల్డ్స్‌ నుంచి 2 ర్యాకులు బొగ్గు రాష్ట్రానికి అదనంగా వచ్చిందని అధికారులు సీఎంకు వివరించారు. రాష్ట్రంలో జెన్‌కో ఆధ్వర్యంలో థర్మల్‌విద్యుత్‌ ఉత్పత్తిని 50 మిలియన్‌ యూనిట్ల నుంచి 69 మిలియన్‌ యూనిట్లకు పెంచినట్ట కూడా వివరించారు. ఈక్రమంలో థర్మల్‌ విద్యుత్‌ కేంద్రాలకు బొగ్గు కొరత రాకుండా సింగరేణి సహా కోల్‌ ఇండియా తదితర సంస్థలతో నిరంతరం సమన్వయం చేసుకోవాలని అధికారులను సీఎం అదేశించారు. రాష్ట్రానికి బొగ్గు తెప్పించుకునేందుకు సరుకు రవాణా విషయంలో షిప్పుల వినియోగంపై ఆలోచనలు చేస్తే రవాణా ఖర్చులు తగ్గుతాయని సీఎం సూచించారు. ఇందుకు సంబంధిత కేంద్ర ప్రభుత్వ విభాగాలతో సమన్వయం చేసుకోవాలని సీఎం ఆదేశించారు.

ఈనేపథ్యంలో పవర్‌ ట్రేడింగ్‌ కార్పొరేషన్‌ నుంచి 170 మెగావాట్ల విద్యుత్‌ కూడా అందుబాటులోకి వస్తోందని అధికారులు సీఎంకు వివరించారు. దీంతో అవసరం మేర విద్యుత్‌ను సమీకరించుకోవాలని అధికారులకు సీఎం ఆదేశాలు జారీ చేశారు. విద్యుత్ అంతరాయాలు లేకుండా ఉండేందుకు తాత్కాలిక చర్యలతో పాటు దీర్ఘకాలిక విద్యుత్‌ ఉత్పత్తి వ్యూహాలపైనా దృష్టిసారించాలని సీఎం ఆదేశించారు. 6300 మెగావాట్ల రివర్స్‌ పంపింగ్‌ విద్యుత్‌ ఉత్పత్తి ప్రాజెక్టు నిర్మాణంపై తగిన చర్యలు తీసుకోవాలని ముఖ్యమంత్రి ఆదేశించారు. సీలేరులో ప్రతిపాదిత 1350 మెగావాట్ల రివర్స్‌ పంపింగ్‌ ప్రాజెక్టుపైనా దృష్టిపెట్టాలని అన్నారు. ఈప్రాజెక్టులను సాకారం చేయడానికి వెంటనే చర్యలు తీసుకోవాలని సీఎం అధికారులకు ఆదేశాలు జారీ చేశారు.