చికోటి క్యాసినో ‘స్కామ్’.! ఇది కూడా అంతేనా.?

ఈ రోజుల్లో క్యాసినోలకు వెళ్ళడం ఓ సరదా వ్యవమారం మాత్రమే కాదు, స్టేటస్ సింబల్ కూడా అయి కూర్చుంది. సంపన్న వర్గాలే కాదు, సామాన్యులు కూడా క్యాసినో ‘కిక్కు’ని రుచి చూస్తున్నారు. రాజకీయ నాయకులు, సెలబ్రిటీలు అయితే ప్రత్యేక విమానాలేసుకుని మరీ క్యాసినోల్లో ‘ఎంజాయ్’ చేస్తున్నారు.

క్యాసినో అనగానే ‘గోవా’ గుర్తుకొస్తుంటుంది చాలామందికి. గోవాలో క్యాసినో కార్యకలాపాలు సర్వసాధారణం. సముద్ర తీరంలో లంగరేసిన షిప్పుల్లో క్యాసినో వ్యవహారాలు అత్యద్భుతంగా జరుగుతాయ్. డ్రగ్స్ సహా జరగకూడని వ్యవహారాలన్నీ అక్కడ స్వేచ్ఛగా జరిగిపోతుంటాయ్.

అయినా, గోవా అనేది ఓల్డ్ ట్రెండ్.! ఎంచక్కా విమానమెక్కి విదేశాలకు వెళ్ళిపోతే.. ఆ కిక్కే వేరప్పా.! అలా విదేశాలకు కేవలం క్యాసినోల కోసం వెళ్ళేవారి సంఖ్య ఇటీవలి కాలంలో గణనీయంగా పెరుగుతోంది. ఇప్పుడిదంతా ఎందుకంటే, చికోటి ప్రవీణ్ అనే వ్యక్తిపై ఈడీ దాడులు, ఈ కేసులో పలువురికి నోటీసులు.. వెరసి, దేశవ్యాప్తంగా ఇప్పుడు ‘క్యాసినో’ అంశపై పెద్ద రచ్చే జరుగుతోంది మరి.

‘క్యాసినో నిజమే.. కానీ, నేనేమీ నేరాలు చేయలేదు. తప్పులు అసలే చేయలేదు..’ అని చెబుతున్నాడు చికోటి ప్రవీణ్. ఆయన పార్టనర్ ఇంకొకాయన అయితే, ఏకంగా తెలంగాణకి చెందిన ఓ మంత్రిగారి ‘ఎమ్మెల్యే స్టిక్కర్’ని తన కారుకి వాడేస్తున్నాడు.

ఏపీలోనూ కొన్నాళ్ళ క్రితం గుడివాడ క్యాసినో వ్యవహారం జరిగింది. ‘ప్రతి యేడాదీ సంక్రాంతి నేపథ్యంలో ఇలాంటివి జరుగుతాయ్..’ అని నిస్సిగ్గుగా అధికార పార్టీ నాయకులు చెప్పుకున్నారు. ఆ క్యాసినోలకీ, చికోటి ప్రవీణ్‌కీ లింకులున్నాయన్నది సర్వత్రా వ్యక్తమవుతున్న అనుమానాలు.

కోట్లాది రూపాయలు ఈ క్యాసినోల ద్వారా చికోటి ప్రవీణ్ చేతుల మీదుగా చేతులు మారినట్లు వార్తలొస్తున్నాయ్. చికోటి ప్రవీణ్.. ఓ సాధారణ వ్యక్తి స్థాయి నుంచి.. ఓ బలీయమైన శక్తిగా (ఆర్థికంగా) ఎదిగిన వైనం, ఆయన ప్రస్తుత సామ్రాజ్యం.. ఇవన్నీ చూస్తే, రాజకీయ ప్రముఖుల అండదండలు లేకుండా ఇవన్నీ ఆయన చెయ్యగలిగేవాడని అనుకోలేం.

ఓ మామూలు వ్యక్తి, ఓ ఇంటిని కట్టుకోవాలంటేనే, స్థానిక ప్రజా ప్రతినిథుల పేరు చెప్పి ఆమ్యామ్యాలు లాగేస్తున్న రోజులివి. అలాంటిది, ఓ సామాన్యుడు.. క్యాసినో ద్వారా కోట్లు గడిస్తే, అందులో రాజకీయ నాయకులకు భాగస్వామ్యం లేకుండా వుంటుందా.?

కానీ, అవన్నీ బయటకు వచ్చే వ్యవహారాలు కావు. డ్రగ్స్ స్కాం చూశాం. ఏం తేలింది అందులో.? ఇది కూడా అంతే. మీడియాకి ఈ వ్యవహారం ప్రస్తుతం జస్ట్ టైమ్ పాస్. రాజకీయ పార్టీలకైతే ఓ డైవర్షన్ వ్యవహారం.!