సీబీఐ వాస్తవాలు తొక్కిపెడుతోంది..

జగన్ అక్రమాస్తుల కేసులో అసలు వాస్తవాలను సీబీఐ తొక్కిపెడుతోందని.. వాటిని కోర్టు దృష్టికి తీసుకురావడంలేదని జగతి పబ్లికేషన్స్ సంస్థ తరపు న్యాయవాదులు పేర్కొన్నారు. వైసీపీ ఎమ్మెల్యే ఆళ్ల రామకృష్ణారెడ్డి సలహా మేరకు జగతి సంస్థలో పెట్టుబడులు పెట్టినట్టు ఈఆర్ఈఎస్ ప్రాజెక్ట్స్, మరో సంస్థ డైరెక్టర్లు చెప్పారని.. దీనిపై సీబీఐ ఆయన వివరణ తీసుకోలేదని వెల్లడించారు. రాంకీ సంస్థలో పెట్టుబడులకు సంబంధించిన కేసులో జగతి పబ్లికేషన్స్ దాఖలు చేసిన డిశ్చార్జ్ పిటిషన్ పై బుధవారం సీబీఐ కోర్టు విచారించింది. ఈ సందర్భంగా జగతి పబ్లికేషన్స్ తరఫున సుప్రీంకోర్టు సీనియర్ న్యాయవాది సిద్దార్థ్ అగర్వాల్ వాదనలు వినిపించారు. ‘రాంకీ సంస్థలకు అప్పటి వైఎస్ ప్రభుత్వం కల్పించిన ప్రయోజనాలకు బదులుగా జగతి పబ్లికేషన్స్ లో రూ.10 కోట్ల మేర పెట్టుబడులు పెట్టినట్లు సీబీఐ ఆరోపిస్తోంది. అయితే, ఈఆర్ఈఎస్, టీడబ్ల్యూసీ ఇన్ ఫ్రా సంస్థల డైరెక్టర్ల నుంచి దర్యాప్తు సంస్థ వాంగ్మూలం తీసుకుంది. వారిలో ఇద్దరు డైరెక్టర్లు ఆళ్ల రామకృష్ణారెడ్డి సూచనల మేరకు పెట్టుబడులు పెట్టినట్టు చెప్పారు. ఎమ్మెల్యే సీటు కోసం ప్రయత్నిస్తున్న ఆళ్ల.. ఆయా సంస్థల డైరెక్టర్లతో జగతిలో పెట్టుబడులు పెట్టించారు. ఈ విషయాన్ని సీబీఐ తొక్కిపెట్టింది’ అని నివేదించారు. వాదనలు విన్న న్యాయమూర్తి బీఆర్ మధుసూదన్ రావు కేసు తదుపరి విచారణను గురువారానికి వాయిదా వేశారు.