దేశంలో డెల్టా ప్లస్ తొలి మరణం..

కరోనాలో అత్యంత ప్రమాదకర వేరియంట్ గా పరిగణిస్తున్న డెల్టా ప్లస్ దేశంలో విజృంభిస్తోంది. యూరప్ లో వెలుగులోకి వచ్చిన ఈ వేరియంట్.. మనదేశంలోనూ విస్తరిస్తోంది. ఇప్పటివరకు దేశవ్యాప్తంగా 40 కేసులు వెలుగు చూడగా.. తాజాగా తొలి మరణం నమోదైంది. మధ్యప్రదేశ్ లో డెల్టా ప్లస్ వేరియంట్ సోకిన రోగి ఒకరు ప్రాణాలు కోల్పోయారు. ఉజ్జయినలో మరణించిన కోవిడ్ రోగి నుంచి తీసిన నమూనాలను జీనోమ్ సీక్వెన్సింగ్ చేయగా.. అది డెల్టా ప్లస్ వేరియంట్ అని నిర్ధారణ అయింది. ఇప్పటివరకు దేశంలో 40 డెల్టా ప్లస్ కేసులు నమోదయ్యాయి. ఇందులో అత్యధికంగా మహారాష్ట్రలో 21, మధ్యప్రదేశ్ లో 6, కేరళలో 3, తమిళనాడులో మూడు, కర్ణాటకలో రెండు, పంజాబ్, జమ్మూకాశ్మీర్, ఏపీల్లో ఒక్కో కేసు వెలుగుచూశాయి. మధ్యప్రదేశ్ కు సంబంధించి ఉజ్జయినిలో రెండు కేసులు నమోదయ్యాయి. అందులో ఒకరు మరణించారు. చనిపోయిన మహిళ కంటే ముందు ఆమె భర్తకు కరోనా సోకిందని వైద్యారోగ్య శాఖ అధికారు తెలిపారు. మహిళ భర్త రెండు డోసుల వ్యాక్సిన్ తీసుకున్నాడని.. ఆమె మాత్రం వ్యాక్సిన్ తీసుకోలేదని వెల్లడించారు.