రాజకీయాల్ని పక్కన పెడితే, దివంగత ముఖ్యమంత్రి వైఎస్ రాజశేఖర్రెడ్డి పేరు ఎప్పటికీ చరిత్రలో నిలిచిపోతుంది. ముఖ్యమంత్రిగా ఆయన అమల్లోకి తెచ్చిన సంక్షేమ పథకాలు అలాంటివి. సంక్షేమ పథకాలనగానే ముందుగా అందరికీ ‘ఓటు బ్యాంకు రాజకీయాలు’ గుర్తుకొస్తాయి. అయితే, వైఎస్ రాజశేఖర్రెడ్డికి అందుకు పూర్తి భిన్నం. స్వతహాగా వైద్యుడు కావడంతో, ఆయనకి ‘పేదోడి నాడి’ బాగా తెలుసు. అందుకే, ఆరోగ్యశ్రీ అనే గొప్ప కార్యక్రమానికి శ్రీకారం చుట్టారు. వైఎస్ రాజశేఖర్రెడ్డి తీసుకొచ్చిన ఈ ఆరోగ్య పథకం ఎన్నో పేద ప్రాణాల్ని నిలబెట్టింది.. నిలబెడుతూనే వుంది. పేదోడికి సైతం పెద్దోడితో సమానంగా వైద్యం.. అనే కాన్సెప్ట్ని ఆరోగ్య శ్రీ ద్వారా అమల్లోకి తెచ్చారు వైఎస్ రాజశేఖర్రెడ్డి.
వైద్యంతోపాటుగా పేదోడికి విద్య కూడా ఎంతో అవసరమని గురించిన ‘డాక్టర్ వైఎస్ రాజశేఖర్రెడ్డి’, ఫీజు రీ-ఎంబర్స్మెంట్ పథకాన్ని తీసుకొచ్చారు. ఖరీదైన వైద్యం ఎలాగైతే పేదోడికీ దక్కుతోందో అలాగే, ఖరీదైన చదువులు కూడా పేదోడికి ‘ఫీజు రీ-ఎంబర్స్మెంట్’ పథకం ద్వారా దక్కుతున్నాయి. జలయజ్ఞంపేరుతో అవినీతి జరిగిందన్న రాజకీయ విమర్శలు పక్కన పెడితే, దశాబ్దాలుగా మూలన పడిపోయిన, వార్తలకే పరిమితమైన చాలా ప్రాజెక్టులు వైఎస్ హయాంలో జీవం పోసుకున్నాయి. వాటిల్లో ఎన్ని పూర్తయ్యాయన్నది వేరే చర్చ. కానీ, వైఎస్ కారణంగానే ఆయా ప్రాజెక్టులు తిరిగి లైవ్ులైట్లోకొచ్చాయి. అందులో పోలవరం ప్రాజెక్టు ఒకటి. ఉచిత విద్యుత్ వంటి పథకాలపై ఎన్ని విమర్శలొచ్చినా, వైఎస్సార్ తన పని తాను చేసుకుపోయారు.
తెలుగుదనానికి నిలువెత్తు నిదర్శనంలా కన్పించే పంచెకట్టు.. దాన్ని మించి చెరగని చిరునవ్వు వైఎస్ రాజశేఖర్రెడ్డిని రాజకీయాల్లో అత్యంత ప్రత్యేకమైన వ్యక్తిగా మార్చాయి. రాజకీయ విమర్శలు చేసే క్రమంలో పదునైన మాటలు ఉపయోగించినా, రాజకీయాలకతీతంగా అన్ని పార్టీలకు చెందిన నేతల్నీ గౌరవించడంలో వైఎస్ రాజశేఖర్రెడ్డి తర్వాతే ఎవరైనా. ఇక, హెలికాప్టర్ ప్రమాదంలో వైఎస్ రాజశేఖర్రెడ్డి మరణించాక ఉమ్మడి తెలుగు రాష్ట్రంలో రాజకీయాలు ఎంతలా దిగజారాయో ప్రత్యేకంగా చెప్పాల్సిన పనిలేదు.
‘వైఎస్సార్ జీవించి వుంటే, రాష్ట్రం విడిపోయేది కాదేమో..’ అన్న భావన ఇప్పటికీ చాలామందిలో వుంది. వైఎస్ కారణంగా రాజకీయాల్లోకొచ్చిన చాలామంది ప్రస్తుతం వేరే వేరే పార్టీల్లో వున్నా, ఆయన మీద అభిమానం మాత్రం వాళ్ళకి ఇప్పటికీ, ఎప్పటికీ తగ్గదుగాక తగ్గదు. తెలుగునాట రాజకీయాల్లో అత్యంత ప్రత్యేకమైన వ్యక్తి వైఎస్ రాజశేఖర్రెడ్డి. ఆయన జయంతి అనగానే, ఆరోగ్యశ్రీ ద్వారా లబ్ది పొందినవారికీ, ఫీజు రీ-ఎంబర్స్మెంట్ ద్వారా ఉన్నత విద్య అభ్యసించినవారికి ప్రత్యేకమైన రోజు.. ఇందులో ఇంకో మాటకు తావు లేదు.
639826 786384Hey! Great stuff, do tell us when you lastly post something like this! 341811