చిత్ర విచిత్ర వైపరీత్యం.. ఆంధ్రప్రదేశ్‌కి కరెంటు కష్టాలట.!

నవ్విపోదురుగాక మనకేటి.? అన్నట్టుంది ‘పెద్దల’ తీరు. పెద్దలంటే, అధికారాన్ని వెలగబెడుతున్న రాజకీయ పెద్దలని అర్థమిక్కడ. దేశంలో ఏ రాష్ట్రం కూడా ప్రస్తుతం కరెంటు కోతల సమస్యని ఎదుర్కోవడంలేదు. అసలు సమీప భవిష్యత్తులో కరెంటు కష్టాలనేవి దేశంలో వుండవనే అభిప్రాయం బలంగా వినిపిస్తున్న రోజులివి.

దేశంలో విద్యుత్ ఉత్పత్తి గణనీయంగా పెరిగింది. అట్నుంచి ఇటు, ఇట్నుంచి అటు.. అంటే, ఎక్కువ ఉత్పత్తి వున్న రాష్ట్రాల నుంచి తక్కువ ఉత్పత్తి వున్న రాష్ట్రాలకు కరెంటు పంపిణీ సజావుగా సాగుతోంది. మరి, ఆంధ్రప్రదేశ్ రాష్ట్రానికి కరెంటు కష్టం ఎందుకొచ్చినట్లు.?

కేంద్రం వైఖరి కారణంగా, ఆంధ్రప్రదేశ్ రాష్ట్రంలో పలు థర్మల్ విద్యుత్ ప్లాంట్లకు బొగ్గు కొరత ఏర్పడి, ఆ కారణంగా విద్యుత్ ఉత్పత్తిలో ఇబ్బందులు తలెత్తుతున్నాయట. ఇదెక్కడి సమస్య.? దేశవ్యాప్తంగా ఏదన్నా ఇంకో రాష్ట్రం ఇలాంటి సమస్యను ఎదుర్కొంటోందా.? అని విద్యుత్ రంగ నిపుణులు, రాజకీయ విశ్లేషకులు ఆరా తీస్తున్నారు.

మొన్నీమధ్యనే ఓ అధికారిక ప్రకటన అధికారుల నుంచి వచ్చింది. దానర్థమేంటంటే, ఓ నాలుగైదు గంటలపాటు.. సాయంత్రం దాటాక రాత్రి సమయంలో ఏసీలు ఆపెయ్యాలట, తద్వారా విద్యుత్ ఆదా చెయ్యాలట. ఇలాంటి ప్రకటన ఇంతకు ముందెన్నడైనా చూశామా.? అని జనం విస్తుపోతున్నారు.

రేప్పొద్దున్న వీధి లైట్లు ఆర్పేయండి.. అనొచ్చేమో. ఆ తర్వాత ఇంట్లో టీవీలూ, రిఫ్రిజిరేటర్లూ ఆపెయ్యమని కోరతారేమో. అయినా, ఇప్పుడంతా విద్యుత్ వాహనాల ట్రెండ్ షురూ అవుతోందాయె. మరి, వాటికి విద్యుత్ ఎలా అందించగలుగుతుంది ప్రభుత్వం.?

ముందు ముందు కరెంటు కోతలు తప్పకపోవచ్చునంటూ సాక్షాత్తూ ప్రభుత్వ సలహాదారు సజ్జల రామకృష్ణారెడ్డి వ్యాఖ్యానించడంతో, రాష్ట్రంలో అప్పుడే కరెంటు కోతల భయం మొదలైంది. ఇప్పుడే కరెంటు కోతల హెచ్చరికలంటే, శీతాకాలం తర్వాత వచ్చే వేసవి సంగతేంటి.? వరుణుడి కరుణతో ప్రాజెక్టులు నిండు కుండల్లా మారినా రాష్ట్రంలో ఈ విద్యుత్ వెతలేంటి.? అసలేం జరుగుతోంది రాష్ట్రంలో.!

అత్యద్భుతమైన పాలన.. అంటూ రాష్ట్రాన్ని చీకట్లోకి నెట్టేస్తోన్న జగన్ సర్కార్, కరెంటు సమస్యలపై ప్రజలకు సంజాయిషీ చెప్పుకుంటుందా.? చెప్పుకోదా.?