గుడ్ న్యూస్: వైరస్ వ్యాప్తి తగ్గుతోంది

కరోనా మహమ్మారి కాస్త శాంతించినట్టుగా కనపడుతోంది. దేశంలో కేసుల సంఖ్య భారీగానే నమోదవుతున్నా.. గతంతో పోలిస్తే ఈ వైరస్ వ్యాప్తి రేటు తగ్గినట్టు తేలింది. ఒక విధంగా ఇది శుభవార్తే అని అంటున్నారు. కరోనా అనేది అత్యంత వేగంగా ఒకరి నుంచి మరొకరికి అంటే వ్యాధి. దీనిని అడ్డుకోవాలంటే ఇది ఒకరి నుంచి మరొకరికి సోకుండా అడ్డుకట్ట వేయాల్సి ఉంటుంది. లాక్ డౌన్ విధించినా.. క్వారంటైన్ పెట్టినా.. ఇదే కారణం. ఈ చైన్ బ్రేక్ చేస్తే.. వ్యాధిని నియంత్రించే అవకాశం ఉంటుంది. ఒక కరోనా బాధితుడు ఈ వ్యాధిని సగటున ఎంతమందికి వ్యాపింపజేస్తాడో తెలియజేసేదే ఆర్ విలువ. దీనిని ఆర్ నాట్ అని కూడా పిలుస్తారు.

సాధారణ ఫ్లూ సోకితే ఐదు రోజుల్లోనే దాని లక్షణాలు బయటపడి చికిత్స తీసుకునే అవకాశం ఉంటుంది. అందువల్ల దీనికి అడ్డుకట్ట వేయడానికి కాస్త ఎక్కువ అవకాశం ఉంటుంది. కానీ కరోనా అనేది లక్షణాలు లేకుండా కూడా ఉండటంతో దీనిని నిరోధించడం కష్టమవుతోంది. పైగా ఫ్లూని నిరోధించే వ్యాక్సిన్, మందులు ఉన్నాయి. కానీ కరోనాకు అవేవీ లేవు. ఫ్లూ ఆర్ విలువ 1.3 గా ఉండగా.. కరోనా ఆర్ విలువ 2 నుంచి 2.5 గా ఉంది. ఈ నేపథ్యంలో ఫ్లూ రోగి నుంచి పది దశలు దాటాక 56 మందికి సోకుతుండగా.. కరోనా రోగి నుంచి పది దశలు దాటాక 2047 మందికి అంటుతోంది. అందువల్లే కరోనా వ్యాప్తి విపరీతంగా జరిగి భారీగా కేసులు నమోదవుతున్నాయి.

అయితే, ఈ విషయంలో తాజాగా కాస్త ఊరట కలిగించే విషయం వెల్లడైంది. చెన్నైలోని ది ఇన్ స్టిట్యూట్ ఆఫ్ మేథమేటికల్ సైన్స్ అధ్యయనం ప్రకారం దేశంలో ఈ వారం ఆర్ విలువలో తగ్గుదల నమోదైంది. గతవారం 1.08 ఉన్న ఆర్ విలువ తాజాగా 0.93 కి తగ్గింది. కరోనా తీవ్రంగా ఉన్న మహారాష్ట్ర, యూపీ, కర్ణాటకలో కూడా ఈ విలువ ఒకటి కంటే తక్కువకు రావడం విశేషం. భారత్ లో కరోనా మొదలైన తర్వాత ఆర్ విలువ ఇంత తక్కువకు రావడం ఇదే తొలిసారి.

ఒక ఏపీలో ఇది 0.95 నుంచి 0.8కి తగ్గగా.. తెలంగాణలో 0.94 నుంచి 0.92కి తగ్గింది. తమిళనాడులో మాత్రం ఇది 0.93 నుంచి 0.99కి పెరిగింది. పరీక్షలు ఎక్కువగా చేయడం ద్వారా కరోనా రోగులును గుర్తించడం పెరగడంతో వ్యాప్తిని నిరోధించగలుగుతున్నారు. గతంలో పరీక్షలు తక్కువగా జరిగేవి. ఫలితంగా కరోనా లక్షణాలు లేని రోగుల నుంచి ఇది ఇతరులకు వ్యాపించింది. ప్రస్తుతం పరీక్షలు సంఖ్య పెంచడంతో కరోనా బాధితులను గుర్తించగలుగుతున్నారు. దీంతో వ్యాప్తికి అడ్డుకట్ట పడుతోంది.