బీహార్‌ అసెంబ్లీ ఎన్నికలు సరే.. ఏపీ ‘స్థానిక’ సమరమెప్పుడు.?

బీహార్‌ అసెంబ్లీ ఎన్నికలకు లైన్‌ క్లియర్‌ అయ్యింది. కేంద్ర ఎన్నికల సంఘం మూడు దశల్లో బీహార్‌ అసెంబ్లీ ఎన్నికలు నిర్వహించనున్నట్లు వెల్లడించింది. మొత్తం 243 అసెంబ్లీ స్థానాలకుగాను అక్టోబర్‌ 28, నవంబర్‌ 3, నవంబర్‌ 7 తేదీల్లో.. అంటే మూడు దఫాలుగా పోలింగ్‌ జరగనుంది. కరోనా నేపథ్యంలో పోలింగ్‌ సమయాన్ని గంట పెంచిన ఈసీ, ఆన్‌లైన్‌ ద్వారా కూడా నామినేషన్ల స్వీకరణ జరుగుతుందని ప్రకటించడం గమనార్హం.

ఎన్నికలంటేనే భారీ ర్యాలీలు, బహిరంగ సభలు. కానీ, ఈసారి వాటికి అవకాశం లేకుండా పోయింది.. కరోనా కారణంగానే. బీహార్‌ అసెంబ్లీ ఎన్నికలకు లైన్‌ క్లియర్‌ అవడంతో, ఆంధ్రప్రదేశ్‌లో స్థానిక ఎన్నికలు ఎప్పుడు జరుగుతాయి.? అన్న చర్చ షురూ అయ్యింది. కరోనా నేపథ్యంలో స్థానిక ఎన్నికల ప్రక్రియ మధ్యలో ఆగిపోయిన విషయం విదితమే. కొన్ని చోట్ల ఏకగ్రీవంగా అభ్యర్థులు ఎన్నికైపోవడమూ జరిగింది గతంలోనే. ఈ స్థానిక సమరం నేపథ్యంలో ప్రభుత్వానికీ, రాష్ట్ర ఎన్నికల కమిషనర్‌కీ మధ్య వివాదం తలెత్తడం.. హైకోర్టు, సుప్రీంకోర్టుల్లోనూ పిటిషన్లు దాఖలవడం, ప్రభుత్వానికి పలుమార్లు ఝలక్‌ ఎదురవడం తెలిసిన విషయాలే.

ఎన్నికల కమిషనర్‌ తొలగింపు ప్రక్రియతో వైఎస్‌ జగన్‌ ప్రభుత్వం అప్రతిష్టను మూటగట్టుకుంది. అదే సమయంలో, ప్రభుత్వాన్ని సంప్రదించకుండా ఎన్నికల ప్రక్రియను వాయిదా వేయడం పట్ల ఎన్నికల కమిషనర్‌ నిమ్మగడ్డ రమేష్‌కుమార్‌ కూడా విమర్శల పాలయ్యారు. కరోనా లాక్‌డౌన్‌ నుంచి అనేక వెసులుబాట్లు వస్తున్న దరిమిలా, అతి త్వరలో స్థానిక ఎన్నికలు నిర్వహించాలన్న డిమాండ్‌ వస్తోంది. అయితే, ప్రభుత్వం మాత్రం, నిమ్మగడ్డ హయాంలో స్థానిక ఎన్నికలు నిర్వహించేందుకు సుముఖంగా లేదన్న ప్రచారం జరుగుతోంది.

‘నిమ్మగడ్డ తిరిగొస్తే బొచ్చు పీకుతాడా.?’ అంటూ ఓ మంత్రిగారు నోరు పారేసుకోవడం చూశాం. అయితే, బీహార్‌లో కరోనా కొంత అదుపులో వున్నా, ఆంధ్రప్రదేశ్‌లో ఆ పరిస్థితి లేదు. ఈ నేపథ్యంలో ఆంధ్రప్రదేశ్‌లో స్థానిక ఎన్నికలకు ఇంకాస్త సమయం పట్టే అవకాశం వుంది.