20 లక్షల కోట్లు – ఆత్మ నిర్భర్‌ భారత్‌: అంకెలు బాగున్నాయ్‌గానీ.!

ప్రధానమంత్రి నరేంద్ర మోడీ నిన్న రాత్రి జాతిని ఉద్దేశించి చేసిన ప్రసంగంలో 20 లక్షల కోట్ల ప్యాకేజీని ‘ఆత్మ నిర్భర్‌ భారత్‌’ పేరుతో ప్రకటించిన విషయం విదితమే. ఈ 20 లక్షల కోట్ల ప్యాకేజీకి సంబంధించి కేంద్ర ఆర్థిక మంత్రి పూర్తి వివరాలు ప్రకటిస్తారని మోడీ చెప్పారు.

తాజాగా ఈ రోజు కేంద్ర ఆర్థిక మంత్రి నిర్మలా సీతారామన్‌, మీడియా ముందుకొచ్చి.. 20 లక్షల ప్యాకేజీకి సంబంధించి కొంత భాగం తాలూకు వివరాల్ని వెల్లడించారు. ముందు ముందు మరిన్ని లెక్కలు బయటకొస్తాయ్‌ గనుక.. ఇప్పుడు వచ్చిన లెక్కలతోనే పూర్తిగా ఈ ప్యాకేజీని సమర్థించడంగానీ, వ్యతిరేకించడంగానీ చేయలేని పరిస్థితి.

టీడీఎస్‌, టీసీఎస్‌ 25 శాతం తగ్గింపు ఖచ్చితంగా ఊరటనిచ్చే విషయమే. ట్యాక్స్‌ రిటర్న్‌ల గడువు పొడిగింపు కూడా ఆహ్వానించదగ్గ అంశంగానే పరిగణించాలి. పనిని బట్టి కాంట్రాక్టర్లకు డబ్బులు చెల్లిస్తామనడం, రియల్‌ ఎస్టేట్‌ నిర్మాణాల కాల పరిమితి 6 నెలలు పొడిగిస్తూ నిర్ణయం తీసుకోవడం, డిస్కమ్ ల కోసం 90 వేల కోట్ల నిధులు కేటాయించడం, చిన్న, మధ్య తరహా పరిశ్రమలకు ఊరటనిచ్చేలా నిర్ణయాలు తీసుకోవడం వంటివన్నీ అభినందించదగ్గ అంశాలే.

అయితే, వీటి వల్ల సామాన్యుడికి డైరెక్ట్‌గా ఒరిగేదేంటి.? అన్నదే మిలియన్‌ డాలర్ల ప్రశ్న. కార్మికుల్నే తీసుకుంటే, కార్మికులుగా గుర్తింపు పొందినవారికి ప్రభుత్వ పథకాల ద్వారా లబ్ది పొందే అవకాశం వుంటుంది. కానీ, కార్మికులుగా గుర్తింపు లేని వలస కార్మికుల మాటేమిటి.? ప్రతి ఒక్కరికీ మేలు చేకూరేలా ఈ ప్యాకేజీ.. అని కేంద్రం చెబుతున్నా, ఆ ‘అందరికీ’ అన్న మాటల్లో స్పష్టత మాత్రం కన్పించడంలేదు.

నిజానికి, బడ్జెట్‌ సమయంలో ప్రతిసారీ ఈ తరహా అంకెల గారడీ గురించి వింటుంటాం. కానీ, సామాన్యుడి చేతికి అందేదెంత.? అన్న విషయానికొచ్చేసరికి.. అందడం సంగతెలా వున్నా, జేబుకి చిల్లు మాత్రం పెరిగిపోతూ వస్తోంది. అయితే, రానున్న రోజుల్లో మరిన్ని ప్రకటనలు కేంద్ర ఆర్థిక మంత్రి నుంచి రాబోతున్నాయి. వాటిల్లో అయినా సామాన్యుడికి ఊరట కలుగుతుందా.? లేదంటే, అక్కడా అంకెల గారడీ చేస్తారా.? అన్నది వేచి చూడాల్సిందే.