ఇకపై ఇళ్లలో కాదు.. అప్రమత్తంగా ఉండాలి

ప్రపంచాన్ని అతలాకుతలం చేస్తున్న కరోనా కారణంగా మొత్తం జనజీవనం స్తంభించింది. పలు దేశాలు ఈ మహమ్మారిని ఎదుర్కొనేందుకు లాక్ డౌన్ విధించాయి. కానీ రోజులు గడుస్తున్నా.. కేసుల సంఖ్య మాత్రం తగ్గడంలేదు. అలా అని లాక్ డౌన్ ఎత్తేస్తే మొదటికే మోసం రాక తప్పదు. కానీ లాక్ డౌన్ ఇలాగే కొనసాగించడం కూడా సాధ్యమయ్యే పరిస్థితి కనిపించడంలేదు. ఇప్పటికే వ్యవస్థలన్నీ కుదేలయ్యాయి. లక్షలాది మంది ఉపాధి లేక పస్తులుంటున్నారు. ఈ నేపథ్యంలో లాక్ తీసేయాలన్నదే ఎక్కువ మంది అభిప్రాయంగా కనిపిస్తోంది. ప్రధాని మోదీ సైతం ఈ దిశగా ఆలోచిస్తున్నట్టు తెలుస్తోంది.

కేంద్రం విధించిన లాక్ డౌన్ ఈనెల 17తో ముగియనుంది. అనంతరం దానిని పొడిగించాలా లేక షరతులతో ఎత్తివేయాలా అనే అంశంపై మేధోమథనం జరుగుతోంది. నిజానికి లాక్ డౌన్ వల్ల కేసులను బాగానే నిరోధించగలిగాం. లేకుంటే దేశంలోకి నేటికి పాజిటివ్ కేసుల సంఖ్య భారీగా పెరిగేదని, లాక్ డౌన్ వల్లే వాటిని అడ్డుకోగలిగామని పేర్కొంటున్నారు. ఈ పరిస్థితుల్లో లాక్ డౌన్ పొడిగింపే సరైనదని కొంతమంది అభిప్రాయపడుతుండగా.. దీర్ఘకాలిక లాక్ డౌన్ మంచిది కాదని, దానివల్ల ఆకలి చావులు పెరిగే అవకాశం ఉందని మరికొందరు చెబుతున్నారు.

వాస్తవానికి లాక్ డౌన్ కారణంగా ఆర్థిక వ్యవస్థ దారుణంగా కుదేలైంది. దీనిని తిరిగి గాడిన పెట్టడం అంత ఆషామాషీ కాదు. దీంతో లాక్ డౌన్ ఎత్తివేసి ఆర్థిక కార్యకలాపాలు ప్రారంభించాలని పలు దేశాలు యోచిస్తున్నాయి. అయితే, లాక్ డౌన్ సడలించిన దేశాల్లో వైరస్ వ్యాప్తి ముమ్మరం కావడం ఆందోళన కలిగిస్తోంది. ముఖ్యంగా దక్షిణ కొరియా, జర్మనీల్లో మళ్లీ కేసులు పెరిగాయి.

ఈ నేపథ్యంలో లాక్ డౌన్ ఎత్తివేసినప్పటికీ, ప్రజలు మాత్రం అప్రమత్తంగా ఉండాలని సూచనలు చేస్తున్నాయి. ఇన్నాళ్లూ ఇళ్లలోనే ఉండాలంటూ ప్రచారం చేసిన బ్రిటన్.. తాజాగా అప్రమత్తంగా ఉండాలని తన నినాదం మార్చింది. అంటే, ప్రజా జీవనం మామూలుగా మారినప్పటికీ, ప్రజలు తమకు తాముగా అప్రమత్తంగా ఉండాలని, కరోనా బారిన పడకుండా తీసుకోవాల్సిన జాగ్రత్తలన్నీ తప్పకుండా పాటించాలని చెబుతున్నాయి. ఈనెల 18 నుంచి మనదేశంలోనూ లాక్ డౌన్ ఎత్తివేసినా.. ప్రజలు మాత్రం తమను తామే రక్షించుకోవాలి. ప్రస్తుత పరిస్థితుల్లో ఇంతకుమించి చేసేదేమీ లేదు.