ఏపీ బీజేపీ.. అంతా అయోమయమే!

ఆంధ్రప్రదేశ్ లో తెలుగుదేశం పార్టీకి ప్రత్యామ్నాయంగా ఎదగాలని, ఆ పార్టీ స్థానాన్ని ఆక్రమించుకోవాలని తహతహలాడుతున్న బీజేపీకి సొంత పార్టీ నేతలతోనే ఇబ్బంది కలుగుతోంది. ఏ అంశంలోనైనా ఒక్కొక్కరూ ఒక్కో విధమైన అభిప్రాయం వ్యక్తం చేస్తుండటం అయోమయానికి తావిస్తోంది. పార్టీ వైఖరికి నేతల స్పందనకు సంబంధం ఉండటంలేదు. పార్టీ మూడు గ్రూపులుగా విడిపోయినట్టు కనిపిస్తోంది. ఇందులో ఒక వర్గం తెలుగుదేశం పార్టీకి అనుకూలంగా వ్యవహరిస్తుండగా.. మరో వర్గం వైసీపీ అనుకూల ధోరణి వ్యక్తంచేస్తోంది. మిగిలినవారు ఎటూ మొగ్గు చూపకుండా సైలెంట్ గా ఉంటున్నారు.

టీడీపీ నుంచి బీజేపీలో చేరిన రాజ్యసభ సభ్యుడు సుజనా చౌదరి తొలి నుంచీ వైసీపీకి గట్టి వ్యతిరేకిగా వ్యవహరిస్తున్నారు. ఆయనకు ఏపీ బీజేపీ అధ్యక్షుడు కన్నా లక్ష్మీనారాయణ మద్దతు పలుకుతున్నారు. మూడు రాజధానుల అంశాన్ని సుజనా తీవ్రంగా వ్యతిరేకించగా.. కన్నా ఆయన బాటలోనే నడిచారు. ఇక బీజేపీ సీనియర్ నేత జీవీఎల్ నరసిరంహారావు మాత్రం కాస్త వైసీపీ అనుకూల గొంతు వినిపిస్తున్నారు. రాజధాని అనేది రాష్ట్ర ప్రభుత్వానికి సంబంధించిన అంశమని, ఇందులో కేంద్రం జోక్యం ఉండబోదని తొలి నుంచీ ఆయన చెబుతున్నారు. దానికి తగినట్టుగానే కేంద్రం ఇటీవల తన వైఖరి అదేనని స్పష్టంచేసింది.

ఎన్నికల ముందు టీడీపీ చంద్రబాబుకు వ్యతిరేకంగా జీవీఎల్ పలు వ్యాఖ్యలు చేశారు. ఇది ఒక విధంగా వైసీపీకి అనుకూలంగా మారింది. ఎన్నికల తర్వాత కూడా జీవీఎల్ అదే విధంగా ముందుకెళ్తున్నారు. దీంతో ఆయన వైసీపీతో లోపాయకారీ అవగాహన కుదుర్చుకుని వారికి వత్తాసు పలుకుతున్నారని విమర్శలు వెల్లువెత్తాయి. ఆశ్చర్యకరంగా టీడీపీ నేతలు ఇలాంటి ఆరోపణలు చేశారు. అయితే, తాను పార్టీ విధానం మేరకే మాట్లాడుతున్నానని.. ఎవరు ఏం మాట్లాడినా తాను చెప్పిందే ఫైనల్ అని జీవీఎల్ ఓ సందర్భంగా స్పష్టంచేశారు. కానీ ఏపీ బీజేపీ వ్యవహారాల ఇన్ చార్జి సునీల్ దియోధర్ మాత్రం పార్టీ అధ్యక్షుడు కన్నా లక్ష్మీనారాయణ చెప్పిందే పార్టీ అభిప్రాయమని పేర్కొన్నారు.

ఇక తాజాగా కేంద్రంలో బీజేపీ, వైసీపీ మధ్య పొత్తు కుదరబోతోందంటూ జరుగుతున్న ప్రచారంలో కూడా ఒక్కొక్కరు ఒక్కో విధంగా స్పందిస్తున్నారు. ఈ విషయంలో రాష్ట్ర పార్టీకి ఎలాంటి సమాచారం లేదని కన్నా చెప్పగా.. సునీల్ దియోధర్, పురందేశ్వరి వంటి నేతలు మాత్రం అలాంటిది ఏమీ లేదని స్పష్టంచేశారు. ఈ నేపథ్యంలో పార్టీ వైఖరి ఏమిటనేది తెలియక పలువురు గందరగోళానికి గురవుతున్నారు.