ఇన్‌సైడ్‌ స్టోరీ: ఐటీ దాడులు.. టీడీపీ మీదనే ఎందుకు.?

ఆదాయపు పన్ను శాఖ.. ఎప్పటికప్పుడు తమకు అందిన సమాచారం మేరకు దేశవ్యాప్తంగా సోదాలు నిర్వహిస్తుంటుంది. అది వారి విధి. అయితే, ఈ మధ్య ఆదాయపు పన్ను శాఖ సోదాలు వివాదాస్పదమవుతున్నాయి. ఇటీవల తమిళనాడులో నటుడు విజయ్‌పై ఐటీ సోదాలు జరిగాయి. ఆ వెంటనే, బీజేపీ శ్రేణులు విజయ్‌కి వ్యతిరేకంగా నినదించడమే కాదు, విజయ్‌ నటిస్తోన్న ఓ సినిమా షూటింగ్‌ని అడ్డుకునేందుకు ప్రయత్నించాయి.

ఇక, ఇప్పుడు ఆంధ్రప్రదేశ్‌ – తెలంగాణ రాష్ట్రాల్లో కొందరు టీడీపీ నేతలకు సంబంధించిన సంస్థలపై సోదాలు నిర్వహించింది ఆదాయపు పన్నుశాఖ.. ఈ వ్యవహారం మళ్ళీ వివాదాస్పదమవుతోంది. టీడీపీ – బీజేపీ మధ్య వైరం గురించి కొత్తగా చెప్పేదేముంది.? అయితే, ఈ సోదాల్ని రాజకీయ కోణంలో చూడటం ఎంతవరకు సబబు.? అన్నది ఆలోచించాల్సిన విషయం.

‘ఆదాయపు పన్ను శాఖ అనేది కేంద్రం పరిధిలోనిది.. సీబీఐ, ఈడీ వంటి సంస్థలు ఎవరి ప్రమేయంతోనూ సోదాలు, తనిఖీలు నిర్వహించవు..’ అని వైఎస్సార్‌ కాంగ్రెస్‌ పార్టీ చెబుతోంది. అదే వైఎస్సార్‌ కాంగ్రెస్‌ పార్టీ, గతంలో అప్పటి కేంద్ర ప్రభుత్వం ప్రేరణతోనే వైఎస్‌ జగన్‌ మీద సీబీఐ ద్వారా కక్ష సాధింపులకు దిగిందని ఆరోపించిన విషయం విదితమే. ఇప్పటికీ ఆ ఆరోపణలకే వైఎస్సార్సీపీ కట్టుబడి వుంది.

ఎవరు అధికారంలో వుంటే, వారికి అనుకూలంగా ఆయా దర్యాప్తు సంస్థలు పనిచేస్తుండడంపై సర్వోన్నత న్యాయస్థానమే అసహనం వ్యక్తం చేసింది. మరోపక్క, ఐటీ సోదాల్ని అంత సీరియస్‌గా తీసుకోవాల్సిన అవసరం లేదన్న చర్చ కూడా ఇంకో వైపు జరుగుతోంది. ‘దేశంలో ఇలాంటివి చాలా చాలానే జరిగాయి.. ఆ తర్వాత అవన్నీ నీరుగారిపోయాయి..’ అంటూ కొన్ని ఉదంతాల్ని రాజకీయ విశ్లేషకులు ప్రస్తావించడం చూస్తున్నాం.

ఏదిఏమైనా, తాజా ఐటీ సోదాలు తెలుగు రాష్ట్రాల్లో కలకలం సృష్టిస్తున్నాయి. పైకి బుకాయిస్తున్నా, తెరవెనుకాల తెలుగుదేశం పార్టీ కుతకుతలాడిపోతోంది దెబ్బ మీద దెబ్బ తగులుతుండడంపై. ఢిల్లీకి వెళ్ళి ప్రధాని నరేంద్ర మోడీని కలవాలని ఇప్పటికే టీడీపీ బృందం ఓ నిర్ణయానికి వచ్చింది.

పైకి ‘రాష్ట్ర ప్రభుత్వం తీరుపై కేంద్రానికి ఫిర్యాదు’ అని చెబుతున్నా, ప్రధాని వద్దకు రాయబారం కోసం పార్టీ నేతల్ని చంద్రబాబు పంపుతున్నారనే ప్రచారం జరుగుతోంది. ఏదిఏమైనా, టీడీపీ ప్రస్తుతం ఐటీ దెబ్బకు విలవిల్లాడుతుండడాన్ని చూసి వైఎస్సార్సీపీ సంబరపడిపోవడానికి వీల్లేదు. రేప్పొద్దున్న వైసీపీ కూడా ఈ తరహా దెబ్బల్ని ఎదుర్కోవాల్సి రావొచ్చు.