ఫాఫం శ్రీసత్య, ఫైమా.! క్లాస్ తీసుకున్న పేరెంట్స్.!

శ్రీ సత్య గాలి తీసేశారు.! ఫైమాకి కూడా షాక్ ఇచ్చారు. తల్లిదండ్రులేంటి.. కంటెస్టెంట్లకు ఝలక్ ఇవ్వడమేంటి.? కానీ, ఇచ్చేశారు. హౌస్ మేట్స్‌తో వారి కుటుంబ సభ్యుల్ని కలిపే ఎపిసోడ్ సుదీర్ఘంగా సాగుతోంది. తాజా ఎపిసోడ్‌లో శ్రీసత్య తల్లిదండ్రులు, ఫైమా తల్లి, రోహిత్ తల్లి.. బిగ్ హౌస్‌లో సందడి చేశారు.

రోహిత్‌ని అతని తల్లి ‘షేర్’ అని అభివర్ణించింది. ‘ఒక్కసారి అయినా కెప్టెన్ అవ్వవా.. ప్లీజ్ మా కోసం..’ అంటూ కొడుకుని అభ్యర్థించింది రోహిత్ తల్లి. కప్పు గెలవాల్సిందేనంటూ కొడుక్కి సూచించిందామె.

ఇక, ఫైమా తల్లి అయితే.. తన కుమార్తెకు చిన్నపాటి వార్నింగ్ కూడా ఇచ్చేసింది. కోపం తగ్గించుకోవాలనీ, ఎటకారం తగ్గించుకోకపోతే కష్టమనీ, బోల్డంతమంది అభిమానులున్నారని ఫైమాకి ఆమె తల్లి చెప్పింది. ‘నువ్వు ఎదగడం చూసి మీ నాన్న గర్వపడుతున్నాడు..’ అని కూడా చెప్పింది ఫైమాతో ఆమె తల్లి.

నామినేషన్ సందర్భంగా జాగ్రత్తగా వుండాలనీ, ఎవిక్షన్ ఫ్రీ పాస్‌ని ఎవరి కోసమూ వృధా చేయవద్దనీ ఫైమాకి ఆమె తల్లి బల్ల గుద్ది మరీ చెప్పింది. ‘ఏమో, అవసరం వస్తే ఇతరుల కోసం వాడాల్సి వస్తుందేమో..’ అంటూ ఫైమా డ్రమెటిక్‌గా చెప్పడం గమనార్హం.

కాగా, శ్రీసత్య పేరెంట్స్‌ది ఇంకాస్త ఇంట్రెస్టింగ్ వ్యవహారం. ‘సిల్లీగా రీజన్స్ చెబుతున్నావ్ నామినేషన్స్ సమయంలో..’ అంటూ శ్రీసత్య గాలి తీసేశారు ఆమె తండ్రి. దాంతో హౌస్ మేట్స్ అంతా ఒక్కసారిగా ఘొల్లున నవ్వారు. ‘నిజం చెబుతున్నారు సర్ మీరు.’ అంటూ హౌస్‌మేట్స్ చెప్పుకొచ్చారు. ‘మీరు కూడా అదే చేస్తున్నారు..’ అని శ్రీ సత్య తండ్రి వారికి కౌంటర్ ఇచ్చారు.

‘ఇంట్లో చాలా మంచిగా వుండేదానివి. ఇక్కడెందుకు నీకు కోపం.? వెటకారం తగ్గించుకో. ఎవర్నీ ఎగతాళి చేయొద్దు.. వెకిలిగా డాన్స్ చేయొద్దు..’ అని శ్రీసత్యకు ఆమె తల్లిదండ్రులు స్వీట్ వార్నింగ్ ఇచ్చారు. శ్రీసత్య తల్లి అనారోగ్యం కారణంగా వీల్ ఛెయిర్‌లో వచ్చారు.

తన తల్లిదండ్రులు తనకు ఏమీ చెప్పకపోయినా, ఇంట్లో పరిస్థితులు అర్థమైపోతున్నాయనీ, తన తల్లికి ఫిజియోథెరపీ జరగడంలేదనీ, చూసుకుంటామని చెప్పిన ఫ్రెండ్స్ పట్టించుకోవడంలేదనీ వాపోయింది శ్రీసత్య తోటి కంటెస్టెంట్లతో.