గులాబీ రాజకీయం.! జాతీయ తెలుగు పార్టీ దిశగా.!

ఇంతలోనే ఎంత మార్పు.? నిజానికి, ఈ మార్పు మంచిదే.! తెలుగు తల్లి ఎవనికి తల్లి.? అని ప్రశ్నించిన తెలంగాణ రాష్ట్ర సమితి, ఇప్పుడు ‘తెలుగు పార్టీ, జాతీయ రాజకీయాల్లో సత్తా చాటబోతోంది..’ అని నినదిస్తోంది. ఔను, ఆ తెలుగు తల్లి ఇప్పుడు సంతోషిస్తుంది. తన నుంచి తెలంగాణ తల్లిని వేరు చేసిన గులాబీ రాజకీయం, ఇన్నాళ్ళకు తనను గుర్తించిందని తెలుగు తల్లి ఆనంద భాష్పాలు విడుస్తుంది.

తెలుగు తల్లి అంటే ఓ వ్యక్తి కాదు, ఓ భావన. తెలుగు ప్రజలందరికీ తల్లి అని. తెలంగాణ తల్లి ఎందుకు వుండకూడదు.? కృష్ణమ్మ, గోదారమ్మ.. ఇలా పేర్లు పెట్టుకుంటాం. ‘అమ్మ’ అనేది ఓ భావన. ఆ భావనకి సైతం రాజకీయం అద్ది, విద్వేషాలు పులిమి.. తెలంగాణ ఉద్యమంలో నానా యాగీ చేసింది తెలంగాణ రాష్ట్ర సమితి.

అది గతం. ఇప్పుడు తెలంగాణ రాష్ట్ర సమితి పేరు మారిపోబోతోంది. భారత రాష్ట్రీయ సమితి అవుతుందట. తెలుగు సినిమాలు పాన్ ఇండియా స్థాయిలో సత్తా చాటుతున్నట్లే, తెలుగు పార్టీ జాతీయ రాజకీయాల్లో దుమ్ము రేపుతుందంటూ తెలంగాణ మంత్రి కల్వకుంట్ల తారకరామారావు ప్రకటించేశారు.

తెలుగు నేల గర్వించదగ్గ విషయమే ఇది. నిజానికి, స్వర్గీయ నందమూరి తారకరామారావు జాతీయ రాజకీయాల్ని శాసించారు. ఆ తర్వాత నారా చంద్రబాబునాయుడు కూడా జాతీయ రాజకీయాలపై తనదైన ముద్ర వేశారు. అటు ఎన్టీయార్, ఇటు చంద్రబాబు.. జాతీయ రాజకీయాల్లోకి వెళ్ళకుండానే, జాతీయ రాజకీయాల్ని ప్రభావితం చేశారు.

ఆ స్థాయిలో తెలుగు నేల పైనుంచి జాతీయ రాజకీయాల్ని ప్రభావితం చేయగలిగిన నాయకుడు ఇంకొకరు రాలేదనడం అతిశయోక్తి కాదు. ఇప్పుడు మళ్ళీ ఇన్నేళ్ళకి తెలుగు నేల పైనుంచి తెలంగాణ ముఖ్యమంత్రి కేసీయార్, జాతీయ పార్టీ పెట్టి, జాతీయ రాజకీయాల్ని ప్రభావితం చేస్తానంటే తెలుగు నేల తరఫున హర్షం వ్యక్తం చేయాల్సిందే.

కానీ, అందుకు ముందుగా కేసీయార్, తెలుగు రాష్ట్రాలపై తనదైన ముద్ర వేయాలి. తెలంగాణలో కేసీయార్‌కి తిరుగు లేదు. మరి, ఆంధ్రప్రదేశ్ మాటేమిటి.? పోలవరం విషయమై కేసీయార్‌ది రెండు నాల్కల ధోరణి. తెలుగు రాష్ట్రాల మధ్య నీటి పంచాయితీ, విద్యుత్ పంచాయితీ.. ఇవి ఓ కొలిక్కి రాలేదు. వచ్చే అవకాశమూ కనిపించడంలేదు.

ముఖ్యమంత్రిగా పొరుగు రాష్ట్రంతో నీటి పంచాయితీ, విద్యుత్ పంచాయితీనే సెటిల్ చేసుకోలేని కేసీయార్, జాతీయ రాజకీయాల్ని ఎలా ప్రభావితం చేయగలుగుతారు.? కాస్త ఆలోచించాల్సిన విషయమే. అన్ని సినిమాలూ పాన్ ఇండియా సినిమాలు అనిపించుకోలేవ్.! అలాగే, రాజకీయ పార్టీలు కూడా.!