ఎవరో తిడితే, ఇంకెవరో క్షమాపణ చెప్పాలట.! ఇదెక్కడి పంచాయితీ.? ఎలాగైనా కాంగ్రెస్ పార్టీ నుంచి బయటకు వెళ్ళగొట్టబడాలనే ఆలోచనతో ఎంపీ కోమటిరెడ్డి వెంకటరెడ్డి వున్నట్టున్నారు. లేకపోతే, అద్దంకి దయాకర్ తన మీద చేసిన విమర్శలకు రేవంత్ రెడ్డి క్షమాపణ చెప్పాలని కోమటిరెడ్డి వెంకటరెడ్డి ఎందుకు డిమాండ్ చేసినట్లు.?
కానీ, తప్పదు.. మునుగోడు ఉప ఎన్నికల్లో కాంగ్రెస్ పార్టీ గెలవకపోతే తన ఇజ్జత్ పోతుందని రేవంత్ రెడ్డి భావిస్తున్నారు. ఈ నేపథ్యంలోనే కోమటిరెడ్డి వెంకటరెడ్డి కోరినట్లు ‘బేషరతు క్షమాపణ’ చెప్పారు, పార్టీ పరంగా అద్దంకి దయాకర్ మీద చర్యలుంటాయనీ అన్నారు. నిజానికి, కోమటిరెడ్డి వెంకటరెడ్డిపై చేసిన విమర్శలకు సంబంధించి అద్దంకి దయాకర్ ఇప్పటికే క్షమాపణ చెప్పారు.. ఆయనకు షోకాజ్ నోటీస్ కూడా జారీ అయ్యింది.
‘రేవంత్ రెడ్డి క్షమాపణ చెబితే సరిపోదు, అద్దంకి దయాకర్‌ని పార్టీ నుంచి బయటకు పంపాల్సిందే..’ అంటున్నారు కోమటిరెడ్డి వెంకటరెడ్డి. పోనీ, అలాగే జరుగుతుందనుకుందాం. మునుగోడు అసెంబ్లీ ఉప ఎన్నికలో సోదరుడు కోమటిరెడ్డి రాజగోపాల్ రెడ్డిని ఓడించేందుకు కోమటిరెడ్డి వెంకటరెడ్డి ప్రయత్నిస్తారా.? ఛాన్సే లేదు. అసలు అస్తిత్వమే ‘కోమటిరెడ్డి బ్రదర్స్’ అని.! ఆ బ్రదర్స్ రెండుగా విడిపోయి, వేర్వేరు పార్టీల్లో వుంటే, ఇద్దరికీ కష్టమే.
‘తగిన సమయంలో కోమటిరెడ్డి వెంకటరెడ్డి సరైన నిర్ణయం తీసుకుంటారు..’ అంటూ సోదరుడి రాజకీయ భవిష్యత్తు విషయమై బీజేపీలోకి దూకేసిన కోమటిరెడ్డి రాజగోపాల్ రెడ్డి చెప్పడం చూస్తోంటే, త్వరలోనే వెంకటరెడ్డి కూడా బీజేపీలోకి దూకెయ్యడం ఖాయంగానే కనిపిస్తోంది.
ఈమాత్రందానికి రేవంత్ రెడ్డి ఎందుకు క్షమాపణ చెప్పారు.? ఇక్కడే వుంది అసలు కిటుకు. మునుగోడులో కాంగ్రెస్ ఓడితే, దానికి బాధ్యుడిగా కోమటిరెడ్డి వెంకటరెడ్డిని చూపించేందుకు రేవంత్ అండ్ టీమ్ సమాయత్తమైపోయింది. అదెలాగూ జరుగుతుంది.
ఆ వైఫల్యం తన ఖాతాలో పడకూడదంటే, ఇప్పుడు ‘తగ్గక’ తప్పని పరిస్థితి రేవంత్ రెడ్డికి వచ్చింది. అద్గదీ అసలు సంగతి. రేవంత్ వర్సెస్ కోమటిరెడ్డి.. ఈ డ్రామా రసవత్తరంగా సాగుతోంది. ఎవరిది పై చేయి అవుతుంది.? అంటే, ఆల్రెడీ పీసీసీ అధ్యక్ష పదవి విషయంలో రేవంత్ రెడ్డిదే పై చేయి అయ్యింది మరి.!