ఇలా చేస్తే, ఆంధ్రప్రదేశ్‌కి ప్రత్యేక హోదా కూడా వస్తుందేమో.!

‘కొత్త వ్యవసాయ చట్టాల విషయంలో వెనక్కి తగ్గే ప్రసక్తే లేదు.. రైతుల్ని ఉద్ధరించడానికే ఆ చట్టాలు.. విపక్షాలు కుట్రపూరిత రాజకీయం చేస్తున్నాయ్..’ అంటూ మేకపోతు గాంభీర్యం చాన్నాళ్ళు ప్రదర్శించిన కమలదళం ఇప్పుడు తోకముడిచింది. ప్రధాని నరేంద్ర మోడీ, కొత్త వ్యవసాయ చట్టాల్ని వెనక్కి తీసుకుంటున్నట్లు ప్రకటించారు.

రాజకీయాల్లో అసాధ్యమన్నది ఏదీ వుండదు. ప్రభుత్వాలు తీసుకునే నిర్ణయాల్ని ప్రజలు తిరస్కరిస్తే.. ఏ ప్రభుత్వమైనా ఎందుకు దిగిరాకుండా వుంటుంది.? ఆంధ్రప్రదేశ్‌కి ప్రత్యేక హోదా విషయంలో అయినా ఇంతే. రైతు చట్టాల విషయంలో రైతులు చూపించిన పోరాట పటిమ, ప్రత్యేక హోదా విషయంలో ఆంధ్రప్రదేశ్ ప్రజలు చూపించగలిగితే, ప్రత్యేక హోదా వచ్చి తీరుతుంది.

కానీ, ఆంధ్రప్రదేశ్‌కి పెద్ద శాపం.. రాష్ట్రంలో రాజకీయ శక్తులు. ప్రధానంగా ప్రధాన రాజకీయ పార్టీలైన తెలుగుదేశం పార్టీ, వైఎస్సార్ కాంగ్రెస్ పార్టీ.. భారతీయ జనతా పార్టీతో తెరవెనుకాల చెట్టాపట్టాలేసుకు తిరుగుతూ ప్రత్యేక హోదాకి పాతరేశాయి. ఈ రెండు పార్టీలకీ ప్రత్యేక హోదా అంటే కేవలం ఎన్నికల స్టంటు మాత్రమే.

అధికార వైసీపీ, ఇప్పుడు తమ ఎంపీలతో రాజీనామా చేయించి ప్రత్యేక హోదా కోసం పోరాటం చేస్తే.. దానికి తెలుగుదేశం పార్టీ కూడా మద్దతిస్తే.. ఆటోమేటిక్‌గా రాష్ట్రంలోని మిగతా పార్టీలు కూడా ప్రత్యేక హోదా విషయంలో అధికార పార్టీతో కలిసి నడిచేందుకు ముందడుగు వేస్తాయి.

కానీ, ఆంధ్రప్రదేశ్ నుంచి అంత చిత్తశుద్ధితో కూడిన రాజకీయాల్ని ఆశించలేం. రాష్ట్రంలో రాజకీయ వ్యవస్థ అంతలా భ్రష్ట్టుపట్టిపోయింది. ప్రత్యేక హోదా పేరుతో తమ పరపతి పెంచుకోవడానికి వైసీపీ గతంలో తమ ఎంపీలతో రాజీనామా చేయించింది. అధికారం పోతుందేమోనన్న భయంతో ధర్మ పోరాట దీక్షల పేరుతో ప్రత్యేక హోదా కోసం అప్పటి ముఖ్యమంత్రి నారా చంద్రబాబునాయుడు ఉద్యమించారు. అవన్నీ బూటకపు పొలిటికల్ డ్రామాలుగానే మిగిలిపోయాయ్.

ఇప్పుడైనా, ఆంధ్రప్రదేశ్ రాజకీయాల్లో మార్పు వస్తే.. ప్రత్యేక హోదాపైనా, రైతుల ఉద్యమం తరహాలో పోరుబాట పడితే.. ప్రత్యేక హోదాపై కేంద్రం దిగిరాకుండా వుంటుందా.? వచ్చి తీరుతుంది.