చేయని నేరానికి 25 ఏళ్లు జైలులో..

వంద మంది దోషులు తప్పించుకున్న పర్లేదు.. కానీ ఒక్క నిర్దోషికి కూడా శిక్ష పడకూడదు అనేది మన న్యాయసూత్రం. సాధారణంగా ఎక్కడైనా ఇదే కరెక్ట్. కానీ అమెరికాలో మాత్రం ఓ యువకుడు చేయని నేరానికి ఏకంగా 25 ఏళ్లపాటు జైలులో ఉన్నాడు. చివరకు అసలు విషయం తెలియడంతో సగానికి పైగా జీవితం అయిన తర్వాత బయటకు వచ్చాడు. 1996 జూన్ 13న అమెరికాలోని ఇదాహో పట్టణంలో 18 ఏళ్ల అంజీ డాడ్జ్ అనే యువతిని ఎవరో అత్యాచారం చేసి హత్య చేశారు. ఆమె తల, మొండెం వేరుచేశారు. పోలీసులు ఎంతగా ప్రయత్నించినా హంతకుడు ఎవరో కనిపెట్టలేకపోయారు. అనంతరం అంజీ స్నేహితుడు క్రిస్టోఫర్ ఓ అత్యాచారం కేసులో అరెస్టయ్యాడు. దీంతో పోలీసులు అంజీని కూడా అతడే హతమార్చాడని అంచనాకు వచ్చారు. నేరం ఒప్పుకుంటే శిక్ష తగ్గుతుందని చెప్పారు.

అప్పటికే భయపడి ఉన్న క్రిస్టోఫర్ నేరం ఒప్పుకున్నాడు. డీఎన్ఏ మ్యాచ్ కాకపోయినా.. నేరం అంగీకరించడంతో కోర్టు అతడికి యావజ్జీవ శిక్ష విధించింది. అయితే, అంజీ తల్లి మాత్రం అసలు నేరస్తుడు క్రిస్టోఫర్ కాదని బలంగా నమ్మింది. దీంతో ఆమె 2014లో ఇన్నొసెన్స్ ప్రతినిధులతో కలిసి కేసును రీఓపెన్ చేయించింది. క్రైం సీన్ నుంచి సేకరించిన డీఎన్ఏ ప్రొఫైల్ సిద్ధం చేశారు. అనంతరం అంజీకి తెలిసినవారు, అనుమానం ఉన్నవారి డీఎన్ఏతో పోల్చి చూడాలని నిర్ణయించారు. ఈ క్రమంలో అంజీ ఇంటి ఎదురుగా ఉన్న బ్రయాన్ లీఫ్ డ్రిప్స్ డీఎన్ఏతో మ్యాచ్ అయింది. విచారణలో నేరం అంగీకరించడంతో క్రిస్టోఫర్ విడుదలయ్యాడు.