రామ్ చరణ్..! మెగా వారసత్వాన్ని ఘనంగా చాటిన నిశ్శబ్ధ విస్ఫోటనం

ఒక తరంలో ఓ వ్యక్తి సాధించిన కీర్తి ప్రతిష్టలు, పేరు ప్రఖ్యాతులు, ఆస్తులు, అంతస్థులను కాపాడటమే కాదు, తర్వాతి తరానికి తీసుకెళ్లాల్సిన బాధ్యత వారసుడిదే. ముఖ్యంగా సినీ, రాజకీయం, పారిశ్రమిక రంగాల్లో తండ్రి కీర్తి, ప్రతిష్టలను నిలబెట్టడమే కాదు.. తనకు తానుగా తండ్రి స్థాయికి తగ్గకుండా పేరు తెచ్చుకోవడం పెను సవాలు. సినిమాల్లో దీనిని ఘనంగా చాటారు మెగా పవర్ స్టార్ రామ్ చరణ్ తేజ్. తెలుగు సినిమాను మూడున్నర దశాబ్దాలుగా నెంబర్ వన్ హీరోగా ఏలుతున్న మెగాస్టార్ చిరంజీవి తనయుడు హీరోగా వస్తున్నాడంటే అభిమానుల్లో, ప్రేక్షకుల్లో చాలా అంచనాలు ఉంటాయి. కారణం.. చిరంజీవి తన స్వశక్తితో సాధించుకున్న కీర్తిని రామ్ చరణ్ నిలబెట్టాల్సి రావడమే. కానీ.. రామ్ చరణ్ తండ్రి పేరునే కాదు.. సినీ ఘన వారసత్వాన్ని.. తన టాలెంట్ తో అంతే ఘనంగా చాటాడు.

ఫ్యాన్స్, ప్రేక్షకుల అంచనాలు నిలబెట్టి..

2007 సెప్టెంబర్ 28న చిరంజీవి తనయుడి తొలి సినిమా ‘చిరుత’ విడుదల. 27న రాష్ట్రవ్యాప్తంగా మెగా అభిమానుల్లో, ప్రేక్షకుల్లో ఒకటే ఉత్కంఠ. మరునాడు విడుదల కాబోయే సినిమాను చూడాలనే ఆతృత. రాష్ట్రంలోని చిరుత విడుదలయ్యే ప్రతి ధియేటర్ పెళ్లి మండపాల్లా ముస్తాబైపోయాయి. చిరుత చూపులతో రామ్ చరణ్ పోస్టర్లలో మెరిసిపోతున్నాడు. అనేక ఉత్కంఠల మధ్య, మెగాభిమానుల ఒత్తిడి మధ్య దాదాపు రాష్ట్రంలోని ప్రధాన కేంద్రాల్లో 27 రాత్రి 10గంటల నుంచే షోలు వేయడం ప్రారంభించారు.

రామ్ చరణ్ తెరపై ఏం చేస్తాడో.. ఎలా నటిస్తాడో.. డ్యాన్స్. ఫైట్స్ ఎలా చేస్తాడో అనే అనుమానాలన్నింటికీ ధియేటర్లలో హోరు సమాధానం ఇచ్చేసింది. ఫస్ట్ ఫైట్, పాటతోనే మెగా వారసుడు అనిపించుకున్నాడు. చిరంజీవి మార్క్ తగ్గలేదని అభిమానులు పులకరించిపోయారు. తొలి సినిమాలోనే డ్యాన్స్ లో గ్రేస్, ఫైట్స్ లో ఈజ్ తోపాటు నటనతో మెప్పించి అభిమానులు, విమర్శకులతో స్టార్ మెటీరియల్ అనిపించుకున్నాడు.

మెగా వారసత్వాన్ని అంతే ఘనంగా..

ముందురోజే సినిమాకు సూపర్ హిట్ టాక్ రావడంతో 28 నుంచి ధియేటర్లు దద్దరిల్లిపోయాయి. పూరి జగన్నాధ్ మార్క్ టేకింగ్, మణిశర్మ మ్యూజిక్ హెల్ప్ అయ్యాయి. దీంతో రామ్ చరణ్ పేరు మోగిపోయింది. డెబ్యూ హీరోగా రామ్ చరణ్ తెచ్చుకున్న ఓపెనింగ్స్, కలెక్షన్లు.. మరో మెగా హీరో వైష్ణవ్ తేజ్ ఉప్పెన సినిమా వచ్చే వరకూ.. దాదాపు 14ఏళ్లు ఉండటం విశేషం. సినీ పెద్దలకు ప్రసాద్ ఐమాక్స్ లో 27నే ప్రత్యేక షో ఏర్పాటు చేశారు చిరంజీవి. రజినీకాంత్ చెన్నైలో సినిమా చూశారు. ఫ్యాన్స్, సెలబ్రిటీల నోట.. ‘చరణ్.. చిరంజీవి పేరు నిలబెట్టాడు తండ్రికి తగ్గ తనయుడు’ అనే మాటే. తొలి సినిమాలోనే చరణ్ చూపిన ఫిజిక్, గ్రేస్ అద్భుతం. దీంతో ఘనమైన మెగా వారసత్వాన్ని అంతే ఘనంగా చాటి తండ్రికి తగ్గ తనయుడు అనిపించుకున్నాడు రామ్ చరణ్.