ఆమె గర్భం.. ఒకే కాన్పులో 10మంది పిల్లలు.. ‘అబద్ధం’..! తేల్చిన సౌతాఫ్రికా ప్రభుత్వం

ఈనెల మొదటి వారంలో దక్షిణాఫ్రికా మహిళ గొసియామె థమారా సిథోలే అనే 37 ఏళ్ల మహిళ ఒకే కాన్పులో పదిమంది (డెకుప్లెట్స్‌) పిల్లలకు జన్మనిచ్చినట్టు వార్తలు వచ్చిన విషయం తెలిసిందే. ఇదొక ప్రపంచ రికార్డుగా ప్రపంచ మీడియా కీర్తించింది. కానీ.. ఇదంతా అబద్ధమని దక్షిణాఫ్రికా ప్రభుత్వం తేల్చి చెప్పింది. సిథోలే ఆమె భర్త అబద్ధం చెప్పారని తెలిపింది. సిథోలే గర్భమే దాల్చలేదని భారీ ట్విస్ట్ ఇచ్చింది. ఆమెను పరీక్షించిన వైద్యుల నివేదికను టెంబిసా అధికారులు మీడియాకు వెల్లడించి పెద్ద షాకే ఇచ్చారు.

మెంటల్‌ హెల్త్ యాక్ట్‌ కింద ఆమెను అదుపులోకి తీసుకుని ఆమె మానసిక స్థితిపై ట్రీట్‌మెంట్‌ ఇప్పిస్తున్నట్లు తెలిపారు. ప్రిటోరియా న్యూస్ ఎడిటర్ అత్యుత్సాహమే ఈ వార్తకు కారణమని తెలిపింది. గతంతో వారికి ముగ్గురు కవలలు పుట్టారనే వార్తలో కూడా నిజం లేదని తేలింది. టెంబిసాలోని ఏ ఆస్పత్రిలో కూడా ఆమె డెలివరీ కోసం చేరలేదని నిర్ధారించాకే అధికారులు ఈ విషయాన్ని వెల్లడించడం విశేషం.