తప్పు చంద్రబాబుది.. గొప్ప వైఎస్ జగన్ మోహన్ రెడ్డిది.!

చిత్తూరు, కడప, అనంతపురం, నెల్లూరు జిల్లాల్లో ఇటీవల కురిసిన భారీ వర్షాల నేపథ్యంలో అనూహ్యమైన నష్టం వాటిల్లింది. వరదల కారణంగా ఎంతోమంది ప్రాణాలు కోల్పోయారు. ‘అందర్నీ ఆదుకుంటాం..’ అని చెబుతోంది ప్రభుత్వం. ‘ఎవర్నీ ఆదుకోవడంలేదు’ అంటున్నాయి విపక్షాలు. బాధితులేమో, ఓట్లడుక్కోవడం కోసం గల్లీ గల్లీకి గతంలో వచ్చిన అధికార పార్టీ నాయకులు, ఇప్పుడు తమను ఆదుకోవట్లేదంటూ కన్నీరుమున్నీరవుతున్నారు.

సరే, ప్రకృతి ప్రకోపానికి ప్రభుత్వాలు మాత్రం ఏం చేయగలుగుతాయి.? అన్నది వేరే వాదన. కానీ, ముందస్తు హెచ్చరికల్ని ప్రభుత్వం బేఖాతరు చేయడం వల్లే ఈ దుస్థితి అన్నది ప్రముఖంగా వినిపిస్తోన్న విమర్శ. ‘అన్నమయ్య’ ప్రాజెక్టు డ్యామ్ గేట్ల వ్యవహారం ఇప్పుడు దేశవ్యాప్తంగా చర్చనీయాంశమయ్యింది.

డ్యామ్ గేట్లు సరిగ్గా పని చేయకపోవడంతో, సకాలంలో వాటిని పైకెత్తలేకపోయారనీ.. దాంతో, మొత్తంగా డ్యామ్ కొట్టుకుపోయిందనీ స్వయంగా కేంద్రం, పార్లమెంటు సాక్షిగా ప్రకటించింది. డ్యామ్ నిర్వహణ విషయంలో దీన్నొక కేస్ స్టడీలా తీసుకోవాల్సిన దుస్థితి వచ్చిందని కేంద్రమే చెబుతోంది.

ఈ విషయమై అధికార వైసీపీకీ, ప్రతిపక్షం తెలుగుదేశం పార్టీకీ మధ్య రాజకీయ రచ్చ షురూ అయ్యింది. 2017లో గేట్లు బాగు చేయాల్సి వుందనీ, అప్పటి చంద్రబాబు ప్రభుత్వం ఆ పని చేయలేదని మంత్రి అనిల్ కుమార్ యాదవ్ చావు కబురు చల్లగా చెప్పారు. 2019లో వైసీపీ అధికారంలోకి వచ్చాక ఆ పని ఎందుకు చేయలేకపోయారన్న ప్రవ్నకు మంత్రి అనిల్ వద్ద సమాధానం దొరకదు.

అన్నట్టు, కొద్ది రోజుల క్రితం పులిచింతల ప్రాజెక్టుకి సంబంధించిన గేటు ఒకటి కొట్టుకుపోయింది. నిజానికి, అప్పట్లోనే చాలా పెద్ద రాజకీయ రచ్చ జరిగింది. అదృష్టవశాత్తూ గేటు కొట్టుకుపోవడంతో ప్రమాదం ఆగిపోయింది. అదే డ్యామ్ కొట్టుకుపోయి వుండి వుంటే.? ఆ నష్టం అంచనాలకు అందేది కాదు.

ఏదన్నా ఘనత వుంటే అది వైఎస్ జగన్ మోహన్ రెడ్డి ఖాతాలో వేసెయ్యడం, తప్పు జరిగితే చంద్రబాబు ఖాతాలో వేసెయ్యడం వైసీపీ నేతలకి, మరీ ముఖ్యంగా మంత్రులకి అలవాటైపోయింది. అంతే తప్ప, జరిగిన ఘటనకి ప్రభుత్వ పెద్దలుగా బాధ్యత వహించడం అనేది ఏనాడో మర్చిపోయారు.