150 ప్లస్లూ.! వైసీపీ అంతర్గత సర్వేలో తేలింది ఇదేనట.!

ఏ రాజకీయ పార్టీకి ఆ రాజకీయ పార్టీ అంతర్గత సర్వేలు చేసుకోవడం మామూలే. ఆయా సర్వేల్లో ఏం తేలుతుందో ప్రత్యేకంగా చెప్పాల్సిన పనిలేదు. వైసీపీ అంతర్గత సర్వేల్లో 151కి పైగా సీట్లు వస్తాయని తేలిందట. అలాగని వైసీపీ అనుకూల మీడియా కుండబద్దలుగొట్టేస్తోంది. కానీ, ఎలా.?

2019 ఎన్నికల తర్వాత గడచిన మూడేళ్ళలో, ఆంధ్రప్రదేశ్ రాష్ట్రంలో జరిగిన అభివృద్ధి ఏంటి.? ఏ ప్రాతిపదికన జనం తిరిగి వైసీపీకే అధికారం కట్టబెడతారు.? అన్న అంశాల గురించి చర్చించుకోవాల్సి వస్తే, ‘గుండు సున్నా..’ అన్న అభిప్రాయం రాజకీయ పరిశీలకుల నుంచి వ్యక్తమవుతోంది.

ప్రత్యేక హోదా వైసీపీ హయాంలో వచ్చిందా.? పోలవరం ప్రాజెక్టు వైసీపీ హయాంలో పూర్తయ్యిందా.? ఆంధ్రప్రదేశ్ రాజధాని అమరావతి నిర్మాణంలో ఒక్క అడుగు అయినా వైసీపీ హయాంలో ముందుకు పడిందా.? అంతెందుకు, ముఖ్యమంత్రి వైఎస్ జగన్ సొంత జిల్లా కడపలో ఉక్కు పరిశ్రమ వచ్చిందా.? అవన్నీ తర్వాత, వైఎస్ జగన్ సొంత నియోజకవర్గం పులివెందులలో బస్టాండు నిర్మాణం జరిగిందా.?

ఇలా, పైన పేర్కొన్న అన్ని ప్రశ్నలకూ సమాధానం ‘నో’ అనే. మరి, ‘యస్.. మళ్ళీ వైసీపీనే అధికార పీఠమెక్కిస్తాం..’ అని, వైసీపీ అంతర్గత సర్వేల్లో జనం ఎలా చెప్పగలిగినట్లు.? జనం చెప్పినా, చెప్పకపోయినా.. చెప్పేశారన్నట్టు వ్యవహరించడం వైసీపీకి కొత్తేమీ కాదు. తిరుపతి లోక్ సభ ఉప ఎన్నిక సందర్భంగా దొంగ ఓటర్లను అధికార వైసీపీ ఎలా తీసుకొచ్చిందో చూశాం. బహుశా సర్వేల కోసం కూడా అలాంటోళ్ళన తీసుకొచ్చారేమో.. అని సోషల్ మీడియాలో వైసీపీ మీద సెటైర్లు పడుతున్నాయ్.

2014 ఎన్నికల్ని తీసుకుంటే, అప్పట్లో టీడీపీ – బీజేపీ కూటమికి, వైసీపీకి మధ్య ఓట్ల తేడా చాలా చాలా తక్కువ. ఆ విషయాన్ని పదే పదే వైసీపీ అధినేత వైఎస్ జగన్ అప్పట్లో చెబుతుండేవారు. 2024 ఎన్నికల్లో కూడా స్వల్ప ఓట్ల తేడా.. ఫలితాల్ని మార్చేస్తుంది. 151 నెంబర్ కాస్తా.. 1 లేదా 5 లేదా 15 లేదా 11 అయిపోవడం పెద్ద వింతేమీ కాదు.

60 శాతం మందికి పైగా ఎమ్మెల్యేల మీద తీవ్ర వ్యతిరేకత వుందని, వాళ్ళంతా ఓడిపోతారనీ ఆ మధ్యనే ప్రశాంత్ కిషోర్, వైసీపీ అధినేతకు ఓ నివేదిక ఇచ్చినట్లుగా ప్రచారం జరిగింది. ఇంతలోనే, 151 సీట్లు గెలిచేస్తామంటూ వైసీపీ అనుకూల మీడియా హడావిడి చేస్తోందంటే, దానర్థమేంటి.? వైసీపీ వెన్నులో వణుకు మొదలైనట్టే కదా.?