కరోనా వైరస్‌: చిన్న విషయమా వైఎస్‌ జగన్‌.?

ప్రపంచ వ్యాప్తంగా కరోనా వైరస్‌ బారిన పడ్డవారి సంఖ్య 10 లక్షలకు చేరువవుతోంది.. ఈ మహమ్మారి దెబ్బకి ప్రాణాలు కోల్పోయినవారి సంఖ్య 50 వేలకు చేరుకుంటోంది.. ప్రపంచ దేశాలన్నీ కరోనా వైరస్‌ దెబ్బకి విలవిల్లాడుతున్నాయి. భారతదేశంలోనూ ఇప్పటికే 50 మందికి పైగా కరోనా వైరస్‌ ధాటికి ప్రాణాలు కోల్పోయారు. ఆంధ్రప్రదేశ్‌లో కరోనా పాజిటివ్‌ కేసుల సంఖ్య సెంచరీ దిశగా దూసుకుపోతోంది. అయినా, ఆంధ్రప్రదేశ్‌ ముఖ్యమంత్రి ‘కూల్‌’ అంటున్నారు. కరోనా వైరస్‌ని అంత సీరియస్‌గా తీసుకుని భయపడాల్సిన పనిలేదంటున్నారు.

ఓ పధ్నాలుగు రోజులు ఇంట్లో వుండి రెస్ట్‌ తీసుకుంటే సరిపోతుందన్నది ముఖ్యమంత్రి వైఎస్‌ జగన్‌ మోహన్‌రెడ్డిగారి ఉవాచ. ఇమ్యూనిటీ బాగా వున్న కొందరిలో ఇది నిజమే కావొచ్చు. కానీ, ప్రపంచ వ్యాప్తంగా ఆర్థిక వ్యవస్థ ఈ వైరస్‌ కారణంగా ఎందుకు కుదేలయ్యింది.? కరోనా దెబ్బకి జనం పిట్టల్లా రాలిపోతున్నదెందుకు.? కరోనా ధాటికి తట్టుకోలేక అగ్ర రాజ్యం అమెరికా సైతం ఎందుకు లాక్‌ డౌన్‌ బాట పడుతోంది.? భారతదేశంలో గత కొద్ది రోజులుగా లాక్‌ డౌన్‌ ఎందుకు కొనసాగుతోంది.? ఈ ప్రశ్నలకు సమాధానం ముఖ్యమంత్రి వైఎస్‌ జగన్‌ మోహన్‌రెడ్డికి తెలియదని ఎలా అనుకోగలం.?

‘భయపడొద్దు..’ అని ప్రజల్ని ఉద్దేశించి ముఖ్యమంత్రి చెప్పడం తప్పేమీ కాదు. కానీ, ‘భయపడాల్సిన పనేలేదు.. ఇంట్లో వుంటే తగ్గిపోతుంది..’ అని సాక్షాత్తూ ముఖ్యమంత్రే చెబితే, కరోనా వైరస్‌ లక్షణాలున్న వ్యక్తి, తనకు కరోనా వుందేమోనని పరీక్ష చేయించుకోవడానికి ముందుకొస్తాడా.? రాని పక్షంలో, సామాజిక వ్యాప్తి జరిగితే.. ఆ తర్వాత పరిణామాలకు ఎవరు బాధ్యత వహిస్తారు.? ప్రజా ప్రతినిథులకు జీతాలు కట్‌ చేయాల్సిన దుస్థితి ఆంధ్రప్రదేశ్‌లో వచ్చింది కేవలం కరోనా వైరస్‌ కారణంగానే. అసెంబ్లీ సమావేశాల్ని ప్రభుత్వం జరపలేకపోతున్నదీ కరోనా వైరస్‌ వల్లనే. పరిస్థితి ఇంత తీవ్రంగా వుంటే, కరోనా వైరస్‌ పట్ల భయపడొద్దంటే ఎలా.?

ముఖ్యమంత్రిగారి మాటలు జనంలోకి ఎంత బలంగా వెళుతున్నాయంటే, దేశవ్యాప్తంగా లాక్‌డౌన్‌ అమల్లో వున్నా.. ఆంధ్రప్రదేశ్‌లో చాలా చోట్ల జనం, కరోనా భయాన్ని పక్కన పెట్టి, స్వేచ్ఛగా రోడ్ల మీద తిరిగేస్తున్నారు.. కరోనా వైరస్‌ వ్యాప్తికి కారణమవుతున్నారు. ముఖ్యమంత్రిగారూ.. ఇప్పటికైనా కాస్త మేలుకోండి.. కరోనా వైరస్‌ అత్యంత ప్రమాదకారి.. ప్రపంచాన్ని వణికిస్తోందది. రాష్ట్ర ఆర్థిక వ్యవస్థని దెబ్బతీసిందది.