రెబెల్ స్టార్ ప్రభాస్ కెరీర్ లో బాహుబలికి సముచిత స్థానం కచ్చితంగా ఉంటుంది. బాహుబలి 1 అండ్ 2 తో ప్రభాస్ రేంజ్ దేశవ్యాప్తంగా పెరిగిపోయింది. ముఖ్యంగా నార్త్ లో ప్రభాస్ కు బోలెడంత క్రేజ్ వచ్చి పడింది. తన ఐదేళ్ల కష్టానికి ప్రతిఫలం దక్కడంతో ప్రభాస్ కూడా ఈ విషయంలో చాలా హ్యాపీగా ఉన్నాడు.
అయితే బాహుబలి తర్వాత సాహో రూపంలో ప్రభాస్ కు ఎదురుదెబ్బ తగిలినా ప్రస్తుతం చేస్తోన్న రాధే శ్యామ్ తో తిరిగి విజయం అందుకోగలనన్న ధీమాతో ఉన్నాడు. ప్రస్తుతం రాధే శ్యామ్ షూటింగ్ 70 శాతం దాకా పూర్తయింది. మిగిలిన మొత్తాన్ని త్వరలోనే పూర్తి చేద్దామనుకున్నా కూడా ప్రస్తుతమున్న కరోనా పరిస్థితుల ప్రభావం కారణంగా షూటింగ్ ఇప్పుడిప్పుడే మొదలయ్యే అవకాశాలు లేవు.
ఇక అసలు విషయానికి వస్తే.. ప్రభాస్ రాధే శ్యామ్ విజయం సాధించాలని చాలా పట్టుదలగా ఉన్నాడు. ఈ సినిమా కోసం సెంటిమెంట్స్ ను కూడా ఫాలో అవుతున్నాడు ప్రభాస్. మొన్న రాధే శ్యామ్ ఫస్ట్ లుక్ ను జులై 10న విడుదల చేసిన సంగతి తెల్సిందే. ఇది బాహుబలి 1 రిలీజ్ డేట్. ఫస్ట్ లుక్ కు పాజిటివ్ రెస్పాన్స్ వచ్చింది.
తాజా సమాచారం ప్రకారం రాధే శ్యామ్ రిలీజ్ డేట్ ను కూడా ఫిక్స్ చేసినట్లు సమాచారం. బాహుబలి 2 రిలీజ్ డేట్ అయిన ఏప్రిల్ 28న రాధే శ్యామ్ ను విడుదల చేయాలని నిర్మాతలు భావిస్తున్నారు. ఇంకా 10 నెలల సమయముంది కాబట్టి అప్పటికి సినిమాను విడుదల చేయడం పెద్ద కష్టం కాకపోవచ్చు.