ఎక్స్ క్లూజివ్: బాలకృష్ణ తో మల్టీ స్టారర్ కి ఎన్.టి.ఆర్ సై అంటాడా?

‘సింహా’, ‘లెజెండ్’ లతో బ్లాక్ బస్టర్ కాంబినేషన్ అనిపించుకున్న నందమూరి బాలకృష్ణ – మాస్ డైరెక్టర్ బోయపాటి శ్రీను కాంబినేషన్ లో మూడవ సినిమా రూపొందుతోన్న సంగతి అందరికీ తెలిసిందే. బాలయ్య బర్త్ డే సందర్భంగా ఓ పవర్ఫుల్ డైలాగ్ తో విడుదలైన ‘ఫస్ట్ రోర్’ టీజర్ కి, అందులోని డైలాగ్ కి అదిరిపోయే రెస్పాన్స్ వచ్చింది. కోవిడ్ కారణంగా బ్రేక్ పడిన ఈ సినిమా మళ్ళీ ఎప్పుడు తిరిగి మొదలవుతుందో తెలియని పరిస్థితి నెలకొంది.

కానీ బోయపాటి శ్రీను మాత్రం ఈ లాక్ డౌన్ సమయాన్ని పూర్తిగా వినియోగించుకొని కథ మీద పూర్తి దృష్టి పెట్టి ఇంకా బెటర్ గా తయారు చేశారు. కథలో భాగంగా వచ్చే ఓ కీలకమైన పాత్ర కోసం నందమూరి కళ్యాణ్ రామ్ లేదా బెల్లంకొండ శ్రీనివాస్ లను పరిశీలిస్తున్నారని గతంలో వార్తలు వచ్చాయి. మాకు అందిన తాజా సమాచారం ప్రకారం బోయపాటి శ్రీను ఆ పరిశీనలని పక్కన పెట్టి నందమూరి అభిమానులు ఎదురుచూస్తున్న మోస్ట్ క్రేజీ కాంబినేషన్ కి శ్రీకారం చుట్టే పనిలో ఉన్నారు.

అదేమిటంటే.. బోయపాటి శ్రీను బాలకృష్ణ సినిమాలో కీలక పాత్ర కోసం యంగ్ టైగర్ ఎన్.టి.ఆర్ ని ఎలాగైనా ఒప్పించాలని సంప్రదింపులు జరుపుతున్నారట. బాలయ్య సినిమాలో అత్యంత పవర్ఫుల్ గెస్ట్ రోల్ అబ్బాయ్ చేస్తే అది క్రియేట్ చేసే ప్రభంజనమే వేరని బోయపాటి ఇలా ప్రయత్నాలు జరుపుతున్నారట. ఇదే గనుక నిజమైతే నందమూరి అభిమానులకు సిల్వర్ స్క్రీన్ మీద ఇదొక కన్నుల పండుగ.. మరి బాలకృష్ణ సినిమా కోసం బోయపాటి నుంచి వెళ్తున్న రిక్వెస్ట్ కి ఎన్.టి.ఆర్ ఒప్పుకుంటాడా? లేదా? అనేది చూడాల్సి ఉంది. ఒప్పుకుంటే మాత్రం బాక్స్ ఆఫీస్ రికార్డ్స్ బద్దలవటం మాత్రం ఖాయం.