మండలి రద్దు చేస్తే ప్రభుత్వం కూలిపోతుందా?

శాసనమండలి విషయంలో ప్రభుత్వం ఇప్పటికే ఓ నిర్ణయానికి వచ్చినట్టుగా స్పష్టం అయ్యింది. శాసనమండలిని రద్దు చేస్తే బిల్లులు ఆమోదానికి డైరెక్ట్ రూట్ ఏర్పడుతుందని అంటుంది. సభలో వైకాపాకు మెజారిటీ ఉన్న మాట వాస్తవమే. అంతమాత్రం చేత, మండలిని రద్దు చేసుకుంటే, ఇంట్లో పురుగు దూరిందని ఇల్లు మొత్తం తగలబెట్టుకున్నట్టే అవుతుంది. ఎందుకంటే, మండలిలో వైకాపాకు మెజారిటీ లేదు. అది తెలిసిన విషయమే.

అయితే, మరో రెండు సంవత్సరాల్లో మండలిలో 19 స్థానాలు ఖాళీ కాబోతున్నాయి. ఈ 19 స్థానాల్లో వైకాపా తన అభ్యర్థులను నిలబెడుతుంది. ఎలాగో అధికారంలోనే ఉన్నది కాబట్టి ఆ 19 స్థానాలు అదే పార్టీ గెలుచుకుంది. రెండేళ్లు ఓపికపడితే చాలు… సభలో వైకాపాకు మెజారిటీ వస్తుంది. మరో ఏడాది ఓపికపడితే దాదాపుగా అన్ని స్థానాలు అంటే 58 స్థానాలు వైకాపా సొంతం అవుతాయి. అప్పుడు రెండు హౌస్ లలో కూడా వాళ్లదే బలం ఉంటుంది. ఈరోజున ఇబ్బంది వచ్చింది అని చెప్పి మొత్తం మండలిని రద్దు చేసుకుంటే ఎలా.

రెండు సంవత్సరాలు ఆగితే సరిపోతుంది. ఈ విషయం వైకాపాకు కూడా తెలుసు. కానీ, అన్ని రోజులు ఆగేందుకు ఆ పార్టీకి ఇష్టం లేనట్టుగా ఉన్నది. లేచిన వెంటనే అన్ని పనులు జరిగిపోవాలి అనుకుంటే ఎలా చెప్పండి. కుదరని పనికదా మరి. అందుకే మండలిని ఎదో విధంగా రద్దు చేయాలని చూస్తున్నది.

ఒకవేళ రద్దు చేసుకుంటే, దాని వలన ప్రతిపక్షాలకు వచ్చే నష్టం ఏమి ఉండదు. అధికారంలో వైకాపాకు తీరని నష్టం వాటిల్లుతుంది. కారణం ఏంటి అంటే, వైకాపాలో 151 మంది ఎమ్మెల్యేలు ఉన్నారు. అలానే ఎమ్మెల్యే సీటు కోసం ఆశించిన వ్యక్తులను అప్పట్లో కొందరిని పక్కన పెట్టారు. వారికి మండలిలో స్థానం కల్పిస్తామని జగన్ అప్పుడే ప్రామిస్ చేశారు.

అంతేకాదు, మండలి నుంచి ఎమ్మెల్సీలు గా ఉన్న వ్యక్తులు ముగ్గురు మంత్రులుగా ఉన్నారు. మండలి రద్దు జరిగితే వాళ్ళు కూడా ఇబ్బందులు పడాల్సి ఉంటుంది. పైకి మండలిని రద్దు చేసినా పర్వాలేదని అంటున్నా, లోపల మాత్రం వారికి ఉండే బాధ వాళ్లకు ఉంటుంది కదా. పదవి ఊడిపోతుంది అంటే ఎవరికైనా బాధ ఉంటుంది.

మండలి రద్దు చేస్తామని చెప్పడం కేవలం వైకాపా ఆడుతున్న డ్రామా మాత్రమే అన్నది స్పష్టం అవుతున్నది. మూడు రాజధానుల బిల్లును సెలక్ట్ కమిటీకి పంపితే అక్కడ మూడు నెలలు పడుతుంది. రద్దుపై తీర్మానం చేసి కేంద్రానికి పంపితే అక్కడ ఎంతసమయం పడుతుందో చెప్పలేము. ముందు సెలక్ట్ కమిటీ రిపోర్ట్ వస్తే, మండలి రద్దును ఉపసంహరించుకుంటారు. అసలు రద్దుపై వైకాపాకు ఎంతమేరకు చిత్తశుద్ధి ఉన్నది అనే విషయం సోమవారంతో తేలిపోతుంది.