ఇన్‌సైడ్‌ స్టోరీ: సీమ సహనానికి సెల్యూట్‌ చెయ్యాల్సిందే

ఉమ్మడి ఆంధ్రప్రదేశ్‌ని పాలించిన ముఖ్యమంత్రుల్లో సింహభాగం రాయలసీమ నుంచి వచ్చినవారే. ఇప్పుడు 13 జిల్లాల ఆంధ్రప్రదేశ్‌ని తీసుకుంటే, తొలి ముఖ్యమంత్రి నారా చంద్రబాబునాయుడు, ప్రస్తుత ముఖ్యమంత్రి వైఎస్‌ జగన్‌ మోహన్‌రెడ్డి.. ఈ ఇద్దరూ సీమ ప్రాంతానికి చెందినవారే. చంద్రబాబుది చిత్తూరు జిల్లా అయితే, వైఎస్‌ జగన్‌ మోహన్‌రెడ్డిది కడప జిల్లా. రాజకీయంగా సీమకు ఇంతటి ప్రాధాన్యత వుంది. కానీ, ఏం లాభం.? సీమ ప్రాంతం ఇప్పటికీ సాగు నీరు, తాగు నీరు కోసం తల్లడిల్లిపోతూనే వుంది.

వైఎస్‌ రాజశేఖర్‌రెడ్డి కావొచ్చు, చంద్రబాబు కావొచ్చు.. సీమ ప్రాంతం నుంచి రాజకీయంగా ఎదిగిన మరొకరు కావొచ్చు.. రాజకీయంగా ఉన్నత పదవులు పొందారేమోగానీ, సీమని మాత్రం ఉన్నత స్థాయికి తీసుకురాలేకపోయారు. ప్రతిసారీ సీమకి ఊరింపులే.. చివరికి ఉస్సూరుమన్పించడాలే. ఉమ్మడి మద్రాస్‌ రాష్ట్రం నుంచి ఆంధ్ర రాష్ట్రం విడిపోయిన సందర్భంలో ఒప్పందాల విషయాన్ని పక్కన పెడితే, కొత్త తరంలో.. ఉమ్మడి ఆంధ్రప్రదేశ్‌ విభజన తర్వాత కూడా పరిస్థితులు మారలేదు.

ఇదిగో సీమకి ‘వరాలు’ అంటూ ప్రతి ఒక్కరూ మభ్యపెడుతూనే వస్తున్నారు. కర్నూలుకి హైకోర్టు వస్తే ఏమవుతుంది.? మొత్తం రాయలసీమ అంతా అభివృద్ధి చెందుతుందా.? అంటే, సీమలో ఎవరూ దీన్ని అంగీకరించరు.. కొందరు రాజకీయ నాయకులు, వారి మద్దతుదారులు తప్ప. మూడు రాజధానుల వ్యవహారం శాసన మండలి దగ్గర ఆగిపోయిన దరిమిలా, సీమ ప్రాంతం సంయమనం పాటిస్తుండడం అందర్నీ ఆశ్చర్యపరుస్తోంది. దీన్ని ప్రజా చైతన్యానికి నిదర్శనంగా చెబుతున్నారు రాజకీయ విశ్లేషకులు.

మరోపక్క, ఉత్తరాంధ్రలో కూడా ఇదే పరిస్థితి కన్పిస్తుండడం గమనార్హం. రెచ్చగొట్టేవారు ఎప్పుడూ వుంటారు.. అటు ఉత్తరాంధ్రలోనూ, ఇటు రాయలసీమలోనూ వున్నారు.. వారి పని వారు చేసుకుపోతున్నారు. అమరావతిలో ఏం జరుగుతుందో చూస్తున్నాం.. అమరావతి రైతుల పేరుతో రాజకీయ పార్టీలు ఆడుతున్న పొలిటికల్‌ గేమ్‌నీ చూస్తున్నాం. చిత్తశుద్ధితో రైతులు చేస్తున్న పోరాటానికి రాజకీయ రంగు అంటుకోవడాన్ని కాదనలేం.

ఒక్కటి మాత్రం నిజం.. అభివృద్ధి వికేంద్రీకరణ జరగాలి. ఎన్నో దశాబ్దాలుగా వింటున్న మాట ఇది. కొత్తగా పాలనా వికేంద్రీకరణ అంశం తెరపైకొచ్చింది. తొలుత అభివృద్ధి వికేంద్రీకరణ చేసి, ఆ తర్వాత పాలనా వికేంద్రీకరణ గురించి ఆలోచించాలన్నది రాష్ట్ర ప్రజానీకం ముక్త కంఠంతో నినదిస్తున్న విషయం. పాలన పాలకులకు సంబంధించినది.. అభివృద్ధి ప్రజలకు సంబంధించినది. దురదృష్టవశాత్తూ రాజకీయ పార్టీలూ, పాలకులూ ప్రజాలకు నిజం చెప్పే ప్రయత్నం చేయడంలేదు. కానీ, ప్రజలు విజ్ఞులు.. ఆ విజ్ఞతే రాష్ట్రాన్ని కాపాడుతోంది. దాన్ని చెడొట్టే ప్రయత్నం జరుగుతూనే వుంటుంది.. అదే రాజకీయమంటే.