మండలిపై మడమ తిప్పుతారా.. ముందుకే వెళతారా?

ఏపీ శాసనమండలి విషయంలో ఆ రాష్ట్ర సీఎం వైఎస్ జగన్ మోహన్ రెడ్డి మదిలో ఏముంది? రద్దు దిశగానే ముందుకెళ్తున్నారా లేక ప్రత్యామ్నాయం ఏదైనా ఆలోచిస్తున్నారా అనే అంశం ఇప్పుడు హాట్ టాపిక్ గా మారింది. మండలి కారణంగా ఏటా రూ.60 కోట్లు ఖర్చవుతోందని, మనలాంటి పేద రాష్ట్రానికి మండలి అవసరమా అని ప్రశ్నించారు. దేశంలోని చాలా రాష్ట్రాల్లో మండలి లేనే లేదని కూడా పేర్కొన్నారు. దీంతో శాసనమండలి రద్దుకే ఆయన మొగ్గు చూపుతున్నారని అందరూ ఓ నిర్ణయానికి వచ్చేశారు.

ఈలోగా కొన్ని ఆసక్తికరమైన పరిణామాలు చోటు చేసుకున్నాయి. మండలిని రద్దు చేయడం వల్ల రాజకీయంగా మనకు కూడా నష్టమేనని, అందువల్ల టీడీపీ ఎమ్మెల్సీలను మన వైపు తిప్పుకుంటే సరిపోతుందని ఒకరిద్దరు నేతలు జగన్ వద్ద ప్రస్తావించినట్టు సమాచారం. దీనికి ఆయన కూడా సానుకూలంగా స్పందించారనే ప్రచారం జరుగుతోంది. శుక్రవారం జగన్ తో పలువురు మంత్రులు భేటీ అయిన సందర్భంగా ఈ అంశాలు ప్రస్తావనకు వచ్చినట్టు తెలుస్తోంది.

2021 నాటికి మండలిలో మన బలం పెరుగుతుందని, అప్పటివరకు కాస్త ఓపిక పడితే బాగుంటుందేమో ఆలోచించాలని మంత్రులు పేర్కొనగా.. అప్పటివరకు ఈ ఇబ్బందులు తప్పవు కదా అని జగన్ ప్రశ్నించినట్టు సమాచారం. ఈలోగా కలిసివచ్చే ఎమ్మెల్సీలను తీసుకుని వారిని మండలిలో ఓ ప్రత్యేక గ్రూప్ గా ఏర్పాటు చేస్తే.. మండలిని సాఫీగా సాగించవచ్చని మంత్రులు పేర్కొన్నట్టు చెబుతున్నారు. కానీ ఈ ప్రతిపాదనపై జగన్ అంత సుముఖంగా లేరని తెలుస్తోంది. చూద్దాంలే అని ధోరణి వ్యక్తంచేసినట్టు సమాచారం.

నిజానికి జగన్ ఓ నిర్ణయం తీసుకుంటే దాని నుంచి అంత త్వరగా వెనక్కి వెళ్లరని ఆయన గురించి తెలిసినవారు చెబుతుంటారు. మరి మండలి విషయంలో ఆయన ఎలాంటి నిర్ణయం తీసుకోబోతున్నారనే అంశం ఉత్కంఠ రేకెత్తిస్తోంది. వాస్తవానికి మండలిపై తన అభిప్రాయం ఇదీ అని జగన్ స్పష్టంగా ఇంకా చెప్పలేదు.

మంచి చేయని మండలి అవసరమా? దీనిపై సుదీర్ఘంగా చర్చించి నిర్ణయం తీసుకుందామని చెప్పి హీట్ పుట్టించారు. దీంతో మీడియాలో కథనాలు హోరెత్తిపోతున్నాయి. మండలి రద్దుకే మొగ్గు చూపుతారా? లేక తన నిర్ణయం నుంచి వెనక్కి వెళతారా అంటూ కుప్పలుతెప్పలుగా విశ్లేషణలు వస్తున్నాయి. వీటన్నింటికీ సోమవారం ఫుల్ స్టాప్ పడనుంది.