కమలం గూటికి ఆలీ?

సినీ నటుడు ఆలీ పార్టీ మారనున్నారా? ఏపీలోని అధికార వైఎస్సార్ సీపీ పార్టీని వీడి కమలం గూటికి చేరనున్నారా? అంటే జరుగుతున్న పరిణామాలు అలాగే కనిపిస్తున్నాయి. ఆలీ శనివారం అకస్మాత్తుగా ఢిల్లీలోని బీజేపీ కార్యాలయంలో ప్రత్యక్షమయ్యారు. దీంతో ఆయన పార్టీ మార్పుపై ఊహాగానాలు ఊపందుకున్నాయి.

వ్యక్తిగత పనుల నిమిత్తమే ఆయన కమలం పార్టీ కార్యాలయానికి వెళ్లారని చెబుతున్నా.. రాజకీయపరమైన కారణాలే ఈ పర్యటన ఉద్దేశమని తెలుస్తోంది. ఎన్నికల ముందు అన్ని పార్టీల గడపలు ఎక్కి దిగిన ఆలీ.. తనకు మంత్రి పదవి ఎవరిస్తారో, వారి పార్టీలో చేరతానని బహిరంగంగానే ప్రకటించారు.

జనసేన అధినేత పవన్ కల్యాణ్ తో, టీడీపీ అధ్యక్షుడు చంద్రబాబుతో, వైఎస్సార్ సీపీ అధినేత వైఎస్ జగన్ మోహన్ రెడ్డితో సమావేశమై.. చివరకు ఎన్నికలకు నెల రోజుల ముందు వైఎస్సార్ సీపీలో చేరారు. అనంతరం ఆ పార్టీ తరఫున ప్రచారం చేశారు. ఈ క్రమంలో తనకు తొలి నుంచి మిత్రుడిగా ఉన్న ఆలీపై పవన్ కూడా విమర్శలు చేయాల్సిన పరిస్థితులొచ్చాయి.

ఆలీ నేరుగా పవన్ ను విమర్శించకపోయినా.. పవన్ మాత్రం ఆయన్ను విమర్శించడంతో ఆలీ కూడా గట్టిగానే స్పందించి పవన్ కు కౌంటర్ కూడా ఇచ్చారు. ఫలితాల తర్వాత వైసీపీ అధికారంలోకి రావడంతో ఆలీకి ఏదో ఒక పదవి ఖాయమని భావించారు. అయితే, వైసీపీ అధికారం చేపట్టి 7 నెలలు గడిచినా.. ఎలాంటి పదవీ దక్కకపోవడంతో ఆలీ అసంతృప్తితో ఉన్నారనే ప్రచారం సాగుతోంది.

తొలుత ఎమ్మెల్యే టికెట్ ఇవ్వాలని జగన్ భావించారని, కానీ సమీకరణాల పరంగా అది కుదరకపోవడంతో ఎమ్మెల్సీ హామీ ఇచ్చారని చెబుతున్నారు. ప్రస్తుతం ఏపీలో పరిణామాలు మండలి రద్దు దిశగా సాగుతుండటంతో ఎమ్మెల్సీ కూడా వచ్చే అవకాశం లేదని ఆలీ నిర్ధారనకు వచ్చారని, ఈ క్రమంలోనే బీజేపీలో చేరడానికి ప్రయత్నాలు మొదలుపెట్టారని అంటున్నారు. ఆలీ త్వరలోనే కాషాయ కండువా కప్పుకుంటారని చెబుతున్నారు.