ప్రదీప్ సినిమా ఎందుకు రిలీజవ్వట్లేదు?

యాంకర్ గా, హోస్ట్ గా తెలుగు రాష్ట్రాల్లో బుల్లితెరపై సూపర్ పాపులర్ అయ్యాడు ప్రదీప్ మాచిరాజు. సినిమాల్లో సరదా కొద్దీ చిన్నా చితకా పాత్రలు వేస్తూ వచ్చాడు. తొలిసారి హీరోగా 30 రోజుల్లో ప్రేమించటం ఎలా అనే చిత్రాన్ని చేసాడు. ఈ సినిమాలోని మొదటి పాట నీలి నీలి ఆకాశం ఎంత పెద్ద హిట్ అయిందో అందరికీ తెలుసు. ఈ ఒక్క పాటతోనే సినిమాకు కావాల్సినంత పబ్లిసిటీ వచ్చేసింది. మార్చ్ 25న ఈ చిత్రాన్ని విడుదల చేయాలనుకున్నారు. ఇందుకోసం ప్రమోషన్స్ కూడా భారీగానే చేపట్టారు. అంతలోనే లాక్ డౌన్ కారణంగా థియేటర్లు మూసి వేయడం, ఇప్పుడు లాక్ డౌన్ లేకపోయినా కేసులు భారీగా పెరుగుతుండడంతో థియేటర్లను మూసే ఉంచారు.

అయితే సినిమా విడుదల అనుకుని నాలుగు నెలలు అయిపోతోంది. మరో రెండు నెలలు కచ్చితంగా థియేటర్లు తెరుచుకునే పరిస్థితి లేదు. తెరుచుకున్నా ఎంతవరకూ ప్రేక్షకులు థియేటర్లకు వస్తారన్నది డౌటే. అందులోనూ చిన్న సినిమాలకు ఎంతవరకూ రిలీజ్ కు ఆస్కారం ఉంటుందన్నది తెలియదు. ఇన్ని డౌట్ల మధ్య కూడా ప్రదీప్ సినిమా 30 రోజుల్లో ప్రేమించటం ఎలా డైరెక్ట్ ఓటిటి రిలీజ్ కు సన్నద్ధం అవ్వడం లేదు.

ఓటిటి వాళ్ళు అడిగినా కూడా ఎందుకో నిర్మాతలు ఆసక్తి చూపించలేదు. మరి వాళ్ళ ఆలోచనా తీరు ఎలా ఉందో. ప్రస్తుతం ఉన్న పరిస్థితుల్లో చిన్న సినిమాలు ఓటిటి వైపే మొగ్గు చూపుతున్నాయి. నిర్మాతలకు భారం దించేసినట్లే అవుతోంది. మరి 30 రోజుల్లో ప్రేమించటం ఎలా రానున్న రోజుల్లో ఓటిటి వైపు వెళుతుందా లేక థియేటర్లు తెరుచుకునే వరకూ ఎదురుచూస్తుందా అన్నది చూడాలి.