వక్కంతం వంశీ అనుకుంటే.. మధ్యలో సురేందర్ వచ్చాడే!

రచయిత నుండి దర్శకుడిగా మారిన వక్కంతం వంశీ ఎన్నో కలలు కన్నాడు. రచయిత నుండి దర్శకుడిగా మారిన ఇతరుల్లాగే తాను కూడా టాప్ డైరెక్టర్ గా ఒక వెలుగు వెలిగిపోవచ్చని అనుకున్నాడు. అయితే తన ఆశలన్నీ అడియాశలే అయ్యాయి. మొదటి సినిమా అల్లు అర్జున్ వంటి స్టార్ హీరో దొరికాడు. అయినా నా పేరు సూర్యతో వంశీ ప్రేక్షకులను మెప్పించలేకపోయాడు. ఆ సినిమా ప్లాప్ ప్రభావం అల్లు అర్జున్ కంటే వంశీపై ఎక్కువ పడింది. అల్లు అర్జున్ ఒక ఏడాది గ్యాప్ తీసుకుని అల వైకుంఠపురములో చిత్రంతో హిట్ కొట్టి బౌన్స్ బ్యాక్ అయ్యాడు కానీ వక్కంతం వంశీ ఇంకా తర్వాతి ప్రాజెక్ట్ విషయంలో సందిగ్ధంలోనే ఉన్నాడు.

నా పేరు సూర్య ప్లాప్ అయినా కానీ గీతా ఆర్ట్స్ తో తన అనుబంధాన్ని కొనసాగిస్తున్నాడు వంశీ. ఆ కాంపౌండ్ లోనే తన నెక్స్ట్ సినిమాకు స్క్రిప్ట్ వర్క్ ఫినిష్ చేసాడు. అయితే ఇప్పుడు హీరో వేటలో ఈ దర్శకుడికి ఇబ్బందులు తలెత్తుతున్నాయి. వరుణ్ తేజ్ తో ఒక సినిమా చేద్దామని ప్రయత్నించాడు. వరుణ్ తేజ్ ను కలిసి లైన్ కూడా చెప్పాడు. వరుణ్ కు కూడా ఆ లైన్ బాగా నచ్చింది. ఫుల్ స్క్రిప్ట్ తో రమ్మని తప్పకుండా సినిమా చేద్దామని అన్నాడు. తాను ప్రస్తుతం బాక్సర్ సినిమాను చేస్తున్నట్లు అదయ్యాక సినిమా ఉంటుందన్నట్లుగా మాట్లాడాడు. అయితే అంతా ఓకే అనుకుంటున్న తరుణంలో సురేందర్ రెడ్డి రూపంలో వంశీకి అడ్డు తగిలింది.

సైరా హిట్ తర్వాత సురేందర్ రెడ్డి పలువురు హీరోలతో సినిమాలు ప్రయత్నించి చివరికి వరుణ్ తేజ్ వద్ద ఆగాడు. సురేందర్ చెప్పిన స్క్రిప్ట్ కు క్లీన్ బౌల్డ్ అయిన వరుణ్ వెంటనే ప్రాజెక్ట్ పనులు మొదలుపెట్టమని చెప్పినట్లు తెలుస్తోంది. ఈ నేపథ్యంలో ముందుగా సురేందర్ రెడ్డి సినిమానే పట్టాలెక్కే అవకాశాలు ఎక్కువగా కనిపిస్తున్నాయి.