ఔను, కరోనా వైరస్ కంటే ఎన్నికలే ముఖ్యం.! ఇదే నిష్టుర సత్యం.!

కరోనా మహమ్మారి ప్రజల ప్రాణాల్ని తోడేస్తోన్న వేళ, దేశంలో నిస్సిగ్గుగా ఎన్నికల వ్యవహారం నడిచింది.. పలు రాష్ట్రాల్లో. పలు రాష్ట్రాల్లో అసెంబ్లీ ఎన్నికలతోపాటు, కొన్ని రాష్ట్రాల్లో ఉప ఎన్నికలు కూడా జరిగాయి. రాజకీయ పార్టీలెలాగూ బాధ్యతారాహిత్యంతోనే వ్యవహరిస్తాయనుకోండి.. అది వేరే సంగతి.

డబ్బు పంచారు.. మద్యం పంచారు, సోషల్ డిస్టెన్సింగ్, మాస్కులు ధరించడం అనే వాటిని పూర్తిగా మరిచిపోయారు.. చెప్పుకుంటూ పోతే చాలానే జరిగింది. అదే ఆ నిర్లక్ష్యమే ఈ రోజు దేశాన్ని అత్యంత ప్రమాదకర పరిస్థితుల్లోకి నెట్టేసింది. మద్రాస్ హైకోర్టు, ఎన్నికల సంఘం మీద హత్య కేసు బనాయించాలంటూ తీవ్ర అసహనం వ్యక్తం చేసింది. మరోపక్క, ఓ మహిళ ఎన్నికల కారణంగా తన భర్తను కోల్పోయానంటూ కోర్టు మెట్లెక్కింది.. ఆ మహిళ, ఓ రాజకీయ ప్రముఖుడి భార్య. ఆ రాజకీయ ప్రముఖుడు బెంగాల్ ఎన్నికల్లో పోటీ చేసి, ఫలితాలు రాకముందే ప్రాణాలు కోల్పోయాడు.

ఆంధ్రపదేశ్ రాష్ట్రంలో తిరుపతి లోక్ సభ ఉప ఎన్నిక ఎంతమంది ప్రాణాలు తీసిందో లెక్కేయడం కష్టం. అక్కడ ఇప్పుడు వేల సంఖ్యలో కరోనా పాజిటివ్ కేసులు వెలుగు చూస్తున్నాయి. నాగార్జున సాగర్ ఉప ఎన్నిక సంగతి సరే సరి. ఏపీలో స్థానిక ఎన్నికలపై రేగిన దుమారం అందరికీ గుర్తుండే వుంటుంది. ఇప్పుడిక తెలంగాణలో కరోనా మహమ్మారి విరుచుకుపడుతున్న వేళ, మునిసిపల్ ఎన్నికలు జరుగుతున్నాయి. ఈ ఎన్నికలపై హైకోర్టు తీవ్రంగా స్పందించింది. ఎన్నికల అధికారులు భూమ్మీదే వున్నారా.? ఆకాశంలో వున్నారా.? అని నిలదీసింది.

పాపం అధికారులు ఏం చేస్తారు.? వారిని నడిపిస్తున్న ప్రభుత్వాలదే అసలు తప్పు అంతా.. ఎన్నికల నిర్వహణ అన్నది ఓ ప్రసహనంగా మారిపోయింది ఇటీవలి కాలంలో. ఎవరు అధికారంలో వుంటే, వారి కనుసన్నల్లోనే అన్నీ జరుగుతున్నాయి. అధికారుల్ని నిందించి ప్రయోజనమేంటి.? ప్రభుత్వాలపై చర్యలుండాలి.. ఆ ప్రభుత్వాల్ని నడిపే రాజకీయ నాయకుల మీద మోపాలి హత్య కేసులు. తెలంగాణ ముఖ్యమంత్రి కేసీఆర్, నాగార్జునసాగర్ ఉప ఎన్నిక ప్రచారం నేపథ్యంలో కరోనా బారిన పడినా, రాష్ట్ర ఎన్నికల సంఘం, రాష్ట్ర ప్రభుత్వం స్థానిక ఎన్నికల వైపు మొగ్గు చూపడం వ్యవస్థల దిగజారుడుతనానికి నిదర్శనం.