తిరుపతి ఉప ఎన్నిక: ఫేక్ ఓట్లే వైసీపీని గెలిపించాయా.?

తిరుపతి ఉప ఎన్నిక ఫలితం వచ్చేసింది. వైసీపీ ఆశించినట్లు ఐదు లక్షల మెజార్టీ రాలేదు. మెజార్టీ దాదాపుగా 2.7 లక్షలు మాత్రమే వచ్చింది. నిజానికి, ఇది వైసీపీకి బంపర్ విక్టరీ. ఇందులో ఇంకో మాటకు తావు లేదు. కానీ, తిరుపతి ఉప ఎన్నిక పోలింగ్ రోజున జరిగిన పరిణామాల్ని చూస్తే, ఈ మెజార్టీ కోసం వైఎస్సార్ కాంగ్రెస్ పార్టీ అంతలా దిగజారిపోవాలా.? అన్న ప్రశ్న తలెత్తక మానదు.

దాదాపు రెండున్నర లక్షల ఫేక్ ఓట్లు వైసీపీ వేయించిందంటూ విపక్షాలు ఆరోపించడం తెలిసిన విషయమే. ఉత్త ఆరోపణ కాదిది, ఫేక్ ఓటర్లు తిరుపతి ఉప ఎన్నిక వేళ పోటెత్తారు. విపక్షాలు ఆరోపించిన స్థాయిలో కాకపోయినా, గట్టిగానే ఫేక్ ఓట్లు పడ్డాయి. వివిధ రాజకీయ పార్టీలకు చెందిన పోలింగ్ ఏజెంట్లు కూడా ఈ ఫేక్ ఓటర్ల కారణంగా తమ ఓట్లను వేసుకోలేకపోయారు.

మరోపక్క, చాలామంది ఓటర్లు (వీళ్ళు రియల్) తమ ఓట్లు గల్లంతయ్యాయని పోలింగ్ కేంద్రాల వద్ద వాపోయారు. తమ ఓట్లను ఎవరో వేసేశారంటూ ఆవేదన వ్యక్తం చేశారు. అంటే, ఓ పక్క విపక్షాలకు పడాల్సిన ఓట్లను ‘కట్’ చేస్తూనే, ఇంకోపక్క ఫేక్ ఓటర్లను అధికార వైసీపీ రంగంలోకి దించిందని అనుకోవాలేమో. అయినాగానీ, మూడు లక్షల ఫేక్ ఓట్లను వేయించడం అంత ఆషామాషీ వ్యవహారం కాదు. ఖచ్చితంగా తిరుపతిలో వైసీపీ తన సొంత బలంతోనే గెలిచింది. కానీ, వచ్చిన మెజార్టీలోనే.. మెజార్టీ ఓట్లు ఫేక్.. అన్నది రాజకీయ వర్గాల్లో జరుగుతోన్న చర్చ.

‘వైసీపీ గుర్తు ఇకపై ఫ్యాన్ కాదు.. వైసీపీని గెలిపించింది బస్సు.. అందుకే, ఇకపై ఆ పార్టీ గుర్తు బస్సు..’ అంటూ సోషల్ మీడియాలో సెటైర్లు పడుతున్నాయి. విద్యా సంస్థలకు చెందిన బస్సుల్ని పెద్దయెత్తున దొంగ ఓట్ల కోసం వైసీపీ వినియోగించిన విషయం విదితమే. ఎన్నిక జరిగిపోయింది.. పలితం వచ్చేసింది.. ఇకపై, ఈ ఆరోపణలు ఇంకా కొనసాగడం అనవసరం. కానీ, సార్వత్రిక ఎన్నికల్లోనూ ఇదే పరిస్థితి వుంటుందా.? అన్నదే సర్వత్రా వెల్లువెత్తుతున్న అనుమానం.