తెలంగాణ బంద్‌.. బెట్టు వీడని కేసీఆర్‌ సర్కార్‌

తెలంగాణలో బంద్‌ కొనసాగుతోంది.. ఇది క్రమేణా సకల జనుల సమ్మె రూపంలోకి మారేలా కన్పిస్తోంది. ఆర్టీసీ కార్మికుల సమ్మెకు మద్దతుగా క్యాబ్‌ డ్రైవర్లూ రంగంలోకి దిగారు. మరోపక్క, రెవెన్యూ ఉద్యోగులు సైతం తమదైన రీతిలో నిలరసనలు వ్యక్తం చేస్తున్నారు. టీఎన్‌జీవో ఇప్పటికే టీఆర్‌ఎస్‌ ఆందోళనలకు మద్దతు పలికిన విషయం విదితమే. ఇంత జరుగుతున్నా కేసీఆర్‌ ప్రభుత్వం మాత్రం ఆర్టీసీ కార్మికుల విషయంలో మొండి వైఖరినే కొనసాగిస్తోంది.

ఆర్టీసీ కార్మికులతో చర్చలు జరపాలని హైకోర్టు సూచించినా, ప్రభుత్వం బెట్టు వీడటంలేదు. నిజానికి, ఈ రోజు ఉదయం 10.30 నిమిషాల నుంచి ఆర్టీసీ కార్మికులు – ప్రభుత్వం మధ్య చర్చలు జరగాల్సి వుంది. అయితే, కార్మికులు సెల్ఫ్‌ డిస్మిస్‌ అయ్యారనే భావనలోనే వుంది కేసీఆర్‌ ప్రభుత్వం. ఆ కారణంగానే చర్చలకు కేసీఆర్‌ ప్రభుత్వం ముందడుగు వేయడం లేదన్న అభిప్రాయం అధికార పార్టీ వర్గాల నుంచి విన్పిస్తోంది.

ఇదిలా వుంటే, ఆర్టీసీ కార్మికుల ఆందోళనలకు అన్ని రాజకీయ పార్టీలకూ మద్దతు పలికిన విషయం విదితమే. ఈ నేపథ్యంలో తెలంగాణ వ్యాప్తంగా బంద్‌ సంపూర్ణంగా కన్పిస్తోంది. డిపోల్లోంచి దాదాపుగా ఎక్కడా ఆర్టీసీ బస్సులు బయటకు రాలేదు. చాలా చోట్ల వ్యాపారులు స్వచ్ఛందంగా బంద్‌ పాటిస్తున్నారు. సాధారణ ప్రజానీకం సైం ఆర్టీసీ కార్మికుల పక్షాన నిలబడటంతో బంద్‌ విజయవంతమయినట్లే కన్పిస్తోంది.

‘ప్రయాణీకులకు ఇబ్బంది కలగకుండా ప్రత్యామ్నాయ ఏర్పాట్లు చేశాం..’ అని ప్రభుత్వం చెబుతున్నా, ఆ ఏర్పాట్లు.. తిరిగి ప్రయాణీకుల ప్రాణాల మీదకు తీసుకొస్తున్నాయి. ప్రైవేటు డ్రైవర్లతో వాహనాలు నడుపుతున్న ప్రభుత్వం, ప్రజల ప్రాణాలతో చెలగాటమాడుతోంది. కాగా, ప్రైవేటు డ్రైవర్‌ ఒకరు, మహిళా కండక్టర్‌పై అఘాయిత్యానికి ప్రయత్నించిన ఘటన అందర్నీ విస్మయానికి గురిచేస్తోంది. ఇంత జరుగుతున్న ప్రభుత్వం మెట్టు దిగకపోవడం గమనార్హం.