రామ్ పోతినేని, బోయపాటి శ్రీను కాంబినేషన్ లో తెరకెక్కిన ఊర మాస్ చిత్రం స్కంద. ఈరోజే ప్రేక్షకుల ముందుకు వచ్చిన ఈ చిత్రం మరి అంచనాలను అందుకుందో లేదో చూద్దాం.
కథ:
ఆంధ్రప్రదేశ్ ముఖ్యమంత్రి కూతుర్ని తెలంగాణ ముఖ్యమంత్రి కొడుకు కిడ్నప్ చేస్తాడు. దీంతో ఏపీ ముఖ్యమంత్రి ఒక యుద్దానికి తెరతీస్తాడు. ఈ మధ్యలోకి రామ్ ఎలా వచ్చాడు, ఆ తర్వాత పరిణామాలు ఎలా మారాయి? ఇందులో శ్రీలీల పాత్ర ఏమిటి? అన్నవి తెర మీదనే చూడాలి.
నటీనటులు:
ఇస్మార్ట్ శంకర్ దగ్గరనుండి రామ్ పోతినేని మాస్ ఇమేజ్ కోసం ప్రయత్నిస్తున్నాడు. అందుకు తగ్గ దర్శకుడు బోయపాటి శ్రీనుని ఎంచుకున్నాడు. రామ్ ఇందులో కేవలం మాస్ గానే కాదు ఊరమాస్ అవతారంలో కనిపించాడు. ఈ లుక్ తనకు సెట్ అయింది. రగ్గడ్ రోల్ లో రామ్ పెర్ఫార్మన్స్ డీసెంట్ గా సాగింది.
శ్రీలీల చూడటానికి చాలా బాగుంది. తనకున్న ఇమేజ్ కు తగ్గట్లుగానే డ్యాన్స్ లలో ఇరగదీసింది. గ్లామరస్ గానూ కనిపించింది. మరోసారి శ్రీకాంత్ కు ముఖ్యమైన పాత్ర ఇచ్చాడు బోయపాటి శ్రీను. తనవంతుగా న్యాయం చేసాడు. తమిళ నటుడు రాజా ఈ చిత్రంలో రామ్ తండ్రి పాత్రలో కనిపించాడు. మిగతావాళ్ళు మాములే.
సాంకేతిక నిపుణులు:
బోయపాటి శ్రీను తను నమ్ముకున్న ఫార్ములాకే మరోసారి కట్టుబడ్డాడు. ఫస్ట్ హాఫ్ తో పోల్చుకుంటే సెకండ్ హాఫ్ లో ఎమోషనల్, యాక్షన్ సీన్స్ భారీగా ఉన్నాయ్. కొన్ని చోట్ల యాక్షన్ సీన్స్ ఓవర్ ది బోర్డ్ వెళ్లాయి కూడా. ఇక క్లైమాక్స్ కూడా సాగదీసినట్లు అనిపిస్తుంది. యాక్షన్ మీద పెట్టిన శ్రద్ధ ఎమోషన్స్ మీద పెట్టలేదు అనిపిస్తుంది. ఇంటర్వెల్ బ్యాంగ్ కంప్లీట్ మాస్ ఫీస్ట్ లా ఉంది.
థమన్ అందించిన బ్యాక్ గ్రౌండ్ మ్యూజిక్ మరీ లౌడ్ గా సాగింది. అఖండకు మించిన రేంజ్ సౌండ్స్ తో మోతమోగించాడు. పాటలు మాత్రం అంతంతమాత్రంగానే ఉన్నాయి. సినిమాటోగ్రఫీ నీట్ గా సాగింది. ఎడిటింగ్ వర్క్ ఇంకా బెటర్ గా ఉండవచ్చు. ఫస్ట్, సెకండ్ హాఫ్ లలో పలు ల్యాగ్ సీన్లు ఈజీగా తొలగించవచ్చు. నిర్మాణ విలువలు గ్రాండ్ గా ఉన్నాయి.
ప్లస్ పాయింట్స్:
- రామ్ మాస్ మేకోవర్
- కొన్ని మాస్ మూమెంట్స్
మైనస్ పాయింట్స్:
- ఓవర్ ది టాప్, సాగదీసిన యాక్షన్ ఎపిసోడ్స్
- రొటీన్ నరేషన్
- క్లైమాక్స్
- సాంగ్స్
విశ్లేషణ:
అక్కడక్కడా మాస్ ప్రేక్షకులను మెప్పించే మూమెంట్స్ ను విజయవంతంగా జొప్పించిన బోయపాటి శ్రీను మిగతా పార్ట్ ను గాలికి వదిలేసాడు అనిపిస్తుంది. మాస్ మూవీ లవర్స్ కు అయితే ఒకసారి నచ్చే అవకాశాలున్న ఈ చిత్రం మిగతా వారికి అంతగా రుచించకపోవచ్చు.
తెలుగు బులెటిన్ రేటింగ్: 2.25/5