సెకండ్ వేవ్ తీవ్రతకు కారణాలివేనా..? నిపుణులు ఏమంటున్నారు..!?

దేశంలో కరోనా సెకండ్ వేవ్ ఉధృతి ప్రకంపనలు రేపుతోంది. రోజువారీ కేసుల సంఖ్య అత్యల్పంగా వేల నుంచి కేవలం రెండు వారాల్లోనే 2.75 లక్షలకు చేరుకుంది. ఈస్థాయి పెరుగుదల ఎవరూ ఊహించనిది. ఇందుకు ప్రజలు కరోనా నిబంధనలు పాటించడంలో చూపిన నిర్లక్ష్యం అని ప్రభుత్వం అంటుంటే.. సెకండ్ వేవ్ మ్యూటేషన్ అని నిపుణులు అంటున్నారు. రెండు వారాల్లో ఏకంగా 25 లక్షల కొత్త కరోనా కేసులు వెలుగులోకి రావడంతో ఆస్పత్రిలో బెడ్లు, ఆక్సిజన్‌కు కొరత ఏర్పడుతోంది.  అత్యవసర మందులతో పాటు టీకాకు కూడా కొరత ఏర్పడుతోంది.

డిసెంబర్ లో బ్రిటన్ లో కరోనా మ్యూటేషన్ స్ట్రెయిన్ రూపంలో ఎలా మ్యూటేషన్ తీసుకుందో భారత్ లో కూడా అదే పరిస్థితి నెలకొందని నిపుణులు అంటున్నారు. జనవరిలో మహారాష్ట్ర అధికారులు వైరస్ కొత్త వేరియంట్‌ను గుర్తించగా.. అందులో బ్రిటన్, దక్షిణాఫ్రికా, అమెరికా(కాలిఫోర్నియా) వేరియంట్లకూ దీనికి మధ్య సారూప్యతలు ఉన్నాయని నిపుణులు అంటున్నారు. ఈ రకంలో రెండు మ్యూటేషన్లు ఉన్నాయని.. దీనిని B.1.617 వైరస్ అని పిలుస్తున్నారు.

స్పైక్ ప్రోటీన్‌లో మార్పుల వల్లే B.1.617 రోగనిరోధక వ్యవస్థలోని యాంటీబాడీలకు చిక్కట్లేదు. వేగంగా వైరస్ వ్యాప్తి చెందడానికి కారణమైంది. దీనివల్ల వ్యాధి తీవ్రత పెరిగిందా లేక కేసులు పెరిగాయా అనేది నిపుణులు కూడా చెప్పలేకపోతున్నారు. ఐరోపా ఈ విషయంలో ముందుంది. నేషనల్ ఇన్‌స్టిట్యూట్ ఆఫ్ వైరాలజీలో 361 వైరస్ శాంపిళ్ల జన్యుక్రమాన్ని జీనోమ్ సీక్వెన్సింగ్ చేసారు. దీంతో మహారాష్ట్రలో నమోదైన కేసుల్లో 60 శాతం దీనివల్లేనని తెలిసింది. ముంబైకి ప్రజలెక్కువగా వస్తారు కాబట్టి మహారాష్ట్రలో ఈ డబుల్ మ్యూటెంట్ ఎక్కువై దాదాపు 10 రాష్ట్రాలకు పాకిందంటున్నారు.

అయితే.. దేశంలోని వేల శాంపిళ్లను పరిక్షించాకే ఓ నిర్ణయానికి రాగలమన్నారు. ఏదేమైనా.. ఈ వైరస్ రోగ నిరోధకశక్తిని నుంచి తప్పించుకునే శక్తిగా మారిందని నిపుణులు అంటున్నారు. ప్రస్తుత టీకా కరోనా నుంచి రక్షణ కల్పించడం కంటే.. తీవ్రత తగ్గిస్తుందంటున్నారు. బాధితులు ఆస్పత్రికి వెళ్లే అవసరం తగ్గడం.. మరణాల రేటు తగ్గే అవకాశం కూడా ఉందంటున్నారు. మొత్తంగా టీకా తీసుకోవడం ఎంతో అవసరమని నిపుణులు అంటున్నారు.