బ్లడ్ బ్రదర్స్ కు ‘చిరు భద్రత’.. గవర్నర్ ప్రశంస

దేశంలోని సూపర్ స్టార్స్ గా చెలామణీ అయ్యే హీరోల్లో తమ ఫ్యాన్స్ గురించి విభిన్నంగా ఆలోచించిన హీరో మెగాస్టార్ చిరంజీవి. ఫ్యాన్స్ అంటే సినిమా రిలీజ్ కి కటౌట్లు బ్యానర్లు, పాలాభిషేకాలు, హంగామా మాత్రమే చేసేవారిగా దశాబ్దాలుగా సమాజంలో వారిపై ఉన్న గుర్తింపును చిరంజీవి పూర్తిగా మార్చేశారు. తనకున్న అశేష అభిమాన గణాన్ని సేవా మార్గం వైపు నడిపించారు. 1998లో ఏర్పాటు చేసిన ‘చిరంజీవి చారిటబుల్ ట్రస్ట్’ ద్వారా రక్తదానం, నేత్రదానం చేసేలా వారిని ప్రోత్సహించారు. దేశంలో మరే స్టార్ హీరో ఇలా చేయలేదు. ఫ్యాన్స్ కూడా చిరంజీవి చూపిన మార్గంలో అంతే నిబద్ధతతో నడిచి చిరంజీవికి మరింత పేరు తెచ్చారు. దీంతో మెగాభిమానుల్ని బ్లడ్ బ్రదర్స్ గా అభివర్ణించారు చిరంజీవి. ఇప్పుడు మరో ముందడడుగు వేసి వారికి “చిరు భద్రత” ఇన్స్యూరెన్స్ చేయించడం విశేషం.

గవర్నర్ ప్రశంస..

తెలంగాణ రాష్ట్ర గవర్నర్ తమిళిసై చేతుల మీదుగా ‘చిరు భద్రత’ పేరుతో లైఫ్ ఇన్స్యూరెన్స్ కార్డులను పంపిణీ చేశారు. 50 కంటే ఎక్కువసార్లు చిరంజీవి బ్లడ్ బ్యాంక్ ద్వారా రక్తదానం చేసిన వారికి రాజ్ భవన్ లో గవర్నర్ చేతుల మీదుగా కార్డులు అందించారు. ఈ సందర్భంగా చిరంజీవిని గవర్నర్ అభినందించారు. అనంతరం ఆమె మాట్లాడుతూ.. ‘ఒక డాక్టర్ గా రక్తం విలువ తెలుసు. తన వృత్తిలో భాగంగా రక్తం అవసరమైన వారికి రక్తదానం చేసేందుకు బంధువులు ముందుకు రాని పరిస్థితులు చూశాను. చిరంజీవి రక్తదానం కార్యక్రమంలో అభిమానుల్ని ప్రోత్సహించడం సంతోషించే విషయం. రక్తదానం చేసేవారు నిజమైన హీరోలు. రెడ్ క్రాస్ తరఫున రక్తదానం కోసం యాప్ రూపొందించాం. చిరంజీవి చారిటబుల్ ట్రస్ట్ కూడా ఇందులో భాగం కావాలని కోరుతున్నాం’ అని అన్నారు.

ఆ వార్తలే కదిలించాయి..

చిరంజీవి మాట్లాడుతూ.. ‘సమయానికి రక్తం అందక చనిపోతున్న బాధితుల వార్తలు నన్ను కదిలించాయి. దీంతో తనపై ప్రేమ చూపే అభిమానుల్ని అదే ప్రేమను నలుగురికీ పంచేలా 1998లో చిరీంజీవి చారిటబుల్ ట్రస్ట్ ఏర్పాటు చేశాను. నా మాటే వేదంగా అభిమానులు రక్తం దానం చేస్తున్నారు. అటువంటి వారికి ఏదైనా భద్రత కల్పించాలని సంకల్పించి ‘చిరు భద్రత’ పేరుతో ఈ కార్యక్రమానికి పూనుకున్నాను. ఇప్పటివరకూ ట్రస్ట్ ద్వారా 9.30లక్షల యూనిట్లు రక్తం సేకరించి పేదలకు 70శాతం అందించి.. మిగిలిన శాతం ప్రైవేటు ఆసుపత్రులకు అందించాం. రక్తదానం చేస్తున్న అందరికీ నా ధన్యవాదాలు’ అని తెలిపారు. ఈ సందర్భంగా రక్తదాతలను గవర్నర్, చిరంజీవి సత్కరించి, ప్రశంసించారు. చిరంజీవి చేసిన ఈ కార్యక్రమం ద్వారా అభిమానులపై ఆయన చూపే ప్రేమకు సర్వత్రా ప్రశంసలు దక్కుతున్నాయి.