రాజు వర్సెస్ రెడ్డి: రొచ్చు రొచ్చుగా మారిన బులుగు ఫైట్.!

అధికార పార్టీకి చెందిన ఇద్దరు ప్రజా ప్రతినిథుల మధ్య సోషల్ మీడియా వేదికగా షురూ అయిన ట్వీట్ల యుద్ధం రొచ్చు రొచ్చగా మారిపోయింది. ఒకరేమో ప్రజలెన్నుకున్న ప్రజా ప్రతినిథి, ఇంకొకరేమో నామినేటెడ్ కోటాలో ప్రజా ప్రతినిథి అయ్యారు. ఆ ఇద్దరూ ఎవరో కాదు వైసీపీ జాతీయ ప్రధాన కార్యదర్శి, రాజ్యసభ సభ్యుడు విజయసాయిరెడ్డి కాగా, ఇంకొకరు నర్సాపురం వైసీపీ రెబల్ ఎంపీ రఘురామకృష్ణరాజు.
ఏమాటకామాటే చెప్పుకోవాలి, ఈ రొచ్చుకి మూల కారణం విజయసాయి ‘రెడ్డి’. ‘జీవితాన్ని రొచ్చు చేసుకున్నావు కదా రాజా! ఏదో ప్రాపర్టీనో, వాహనాలనో అద్దెకు ఇచ్చినట్టు.. నిన్ను నీవే బాడుగకు ఇ్చుకుని పెయిడ్ మైక్ అయ్యావు.

లెక్క పంపిస్తే ట్వీట్లు, స్టేట్‌మెంట్లు ఏదైనా చేస్తావు. ఇంత నీఛపు జీవితం భారంగా లేదూ? గెలిపించిన ప్రజలను తాకట్టు పెట్టేశావు కదా?‘ అన్నది విజయసాయిరెడ్డి ట్వీటు సారాంశం.
సోషల్ మీడియా వేదికగా ఇలాంటి ట్వీట్లు టీడీపీ అధినేత చంద్రబాబు మీదా, టీడీపీ జాతీయ ప్రధాన కార్యదర్శి నారా లోకేష్ మీదా, జనసేన అధినేత పవన్ కళ్యాణ్ మీదా.. ఇంకొందరు రాజకీయ ప్రత్యర్థుల మీదా విజయసాయిరెడ్డి వేయడం, అట్నుంచి చీవాట్లు తినడం మామూలే.

ఈసారి రఘురామకృష్ణరాజు కూడా తనదైన స్టయిల్లో విజయసాయిరెడ్డికి చీవాట్లు పెట్టేశారు. ‘అవునా? నా జీవితం నీకు, ఏ1కి భారంగా వుందనే కదా నన్ను కూడా కడతేర్చాలనుకుంటున్నారు పాపం వివేకానందరెడ్డిలా! ప్రజల ఆస్తులు తాకట్టు పెట్టి సొమ్ములు దోచేస్తున్న మిమ్మల్ని రొచ్చులో తొక్కే రోజు దగ్గర పడింది మిస్టర్ ఏ2!’ అంటూ ట్వీటేశారు రఘురామకృష్ణరాజు.

విజయసాయిరెడ్డి ట్వీటుకి విమర్శల పర్వం కొనసాగుతోంటే, రఘురామ ట్వీట్లకు ప్రశంసలు దక్కుతున్నాయి. అటు తిరిగి ఇటు తిరిగి వ్యవహారం మాజీ మంత్రి వైఎస్ వివేకానందరెడ్డి హత్య వద్దకు రావడంతో అధికార పార్టీ ఇరకాటంలో పడిపోయింది. అధికారంలోకి వచ్చి రెండేళ్ళయినా సొంత బాబాయ్ వివేకానందరెడ్డి డెత్ మిస్టరీని వైఎస్ జగన్ మోహన్ రెడ్డి ఛేదించలేకపోవడం వైఫల్యం కాక మరేమిటన్న చర్చ సర్వత్రా జరుగుతోంది. అన్నిటికీ మించి, ‘ప్రజల ఆస్తులు తాకట్టు పెట్టి సొమ్ములు దోచేస్తున్న మిమ్మల్ని రొచ్చులో తొక్కే రోజు దగ్గరపడింది..’ అంటూ రఘురామ పేర్కొన్న వైనానికి మంచి స్పందన లభిస్తోంది.