మాస్క్ లేదని మేకను అరెస్టు చేసిన పోలీసులు.. ఎక్కడో తెలుసా?

అత్యుత్సాహంతో చేసే పనులు ఒక్కోసారి ఆశ్చర్యం కలిగిస్తాయి.. మరోసారి నవ్వు తెప్పిస్తాయి. అటువంటి ఘటనే ఒకటి ఉత్తరప్రదేశ్ లో జరిగింది. ‘మాస్క్ పెట్టుకోలేదని ఓ మేకను పోలీసులు అరెస్టు చేయడం’. మేక ఏంటీ.. మాస్కు పెట్టుకోకపోవడమేంటి.. అందుకు అరెస్టు చేయడమేంటీ.. అనుకుంటున్నారా.. అయితే చదవండి..

కాన్పూర్ లోని బెకొంగంజ్ ఏరియాలో ఓ మేక ఊరకే అరుస్తూ అటు ఇటూ తిరుగడం అక్కడ ఉన్న పోలీసులు గమనించారు. ‘చెవి కోసిన మేకలా..’ అనే సామెతలా నిజంగానే అరుస్తూండటంతో.. అసలు మేక ఇక్కడెందుకు తిరుగుతోంది.. ఎందుకలా అరుస్తోంది.. మాస్క్ కూడా లేదు. ఇది నేరమే అనుకుంటూ దాన్ని అరెస్టు చేసి స్టేషన్ కు తీసుకెళ్లారు. పొలం నుంచి వచ్చిన మేక యజమానికి విషయం తెలిసి ఆశ్చర్యపోయాడు. మేకను అరెస్టు చేయడమేంటి నాయనో.. అనుకుంటూ వెంటనే స్టేషన్ కు వెళ్లాడు.

‘మాస్క్ పెట్టుకోలేదని మీరు తీసుకొచ్చిన మేక నాదే.. దయచేసి నా మేకను వదిలేయండి. మరోసారి ఇలా జరగనివ్వను’ అని బతిమాలుకున్నాడు. దీనికి పోలీసులు.. ‘ఇవి కరోనా రోజులు. మేకకు మాస్క్ పెట్టకుండా అలా వదిలేస్తా ఎలా. మరోసారి మాస్క్ లేకుండా రోడ్డుపై మేక కనిపిస్తే.. మటన్ అయిపోతుంది.. అనే రేంజ్ వార్నింగ్ ఇచ్చా’క తీసుకెళ్లమన్నారు. ప్రస్తుతం ఈ విషయం చర్చనీయాంశమైంది. మేకకు మాస్క్ ఏంటి? అని. దీనికి పోలీసులు చెప్పిన సమాధానం.. ‘మేకను అంతకుముందు మరో వ్యక్తి ఎత్తుకున్నాడు. అతనికి మాస్క్ లేదు. మిమ్మల్ని చూసి మేకను వదిలేసి పారిపోయాడు. ఒకవేళ ఆ వ్యక్తికి కరోనా ఉంటే.. వైరస్ మేకకు అక్కడినుంచి మనుషులకు వస్తే.. అందుకే అరెస్టు చేశాం’ అని చెప్పుకొచ్చారు.

పెంపుడు జంతువులకు మాస్క్ వేయాలనేది తమ ఆలోచనగా చెప్పారు. ఈ విషయం సోషల్ మీడియాలో వైరల్ అయింది. దీంతో వారు దిగొచ్చి మేకకు కాదు.. మనుషులకు మాస్క్ ఉండాలి నిజమే.. అంటున్నారట.