కిరాయి మూకలకు భయపడం.! వెయ్యి కోట్లు సుపారీ ఇచ్చుకున్నా బెదరం: పవన్ కళ్యాణ్.!

‘మీ దగ్గర కిరాయి మూకలుంటే భయపడతామా.? 250 కోట్లు కాదు.. 1000 కోట్లు సుపారీ ఇచ్చుకో.. మేం బెదరం..’ అంటూ నేరుగా వైసీపీకి సవాల్ విసిరారు జనసేన అధినేత పవన్ కళ్యాణ్. గత కొద్ది రోజులుగా హైద్రాబాద్‌లోని పవన్ కళ్యాణ్ ఇంటి వద్ద కొందరు గుర్తు తెలియని వ్యక్తులు రెక్కీ నిర్వహిస్తున్న విషయం విదితమే.

అనుమానితుల్ని జూబ్లీహిల్స్ పోలీసులు అదుపులోకి తీసుకుని ప్రశ్నించారు. తప్పతాగి పవన్ కళ్యాణ్ ఇంటి వద్ద గలాటా చేశారనీ, రెక్కీకి సంబంధించి ఆధారాలు లభించలేదనీ, నిందితులకు నోటీసులు ఇచ్చామని పోలీసులు పేర్కొన్నారు.

అయితే, జనసేన మాత్రం పవన్ కళ్యాణ్ హత్యకు కుట్ర చేస్తున్నారనీ, 250 కోట్ల రూపాయల సుపారీ ఇచ్చి ఆయన్ని చంపేందుకు ప్రయత్నిస్తున్నారని ఆరోపిస్తోంది. ఈ నేపథ్యంలో జనసేన అధినేత స్పందించారు. మంగళగిరిలోని జనసేన రాష్ట్ర కార్యాలయం నుంచి ఇప్పటం బయల్దేరిన జనసేనాని, మీడియాతో మాట్లాడారు.

‘ఇప్పటంలో ఇళ్ళను కూల్చేస్తారా.? జనసేన పార్టీ ఆవిర్భావ సభ నిర్వహణ కోసం భూముల్ని ఇచ్చిన రైతుల్ని వేధిస్తారా.? ఇప్పటంలో రోడ్డు వెడల్పు పేరుతో డ్రామాలు ఆడితే.. ఇడుపులపాయలో హైవే వేస్తాం జాగ్రత్త..’ అంటూ ముఖ్యమంత్రి వైఎస్ జగన్ మోహన్ రెడ్డిని హెచ్చరించారు జనసేన అధినేత.

‘సజ్జల రామకృష్ణారెడ్డి డిఫాక్టో సీఎం.. రాష్ట్రంలో శాంతి భద్రతలు క్షీనించాయి.. కక్ష సాధింపు చర్యలు రాజ్యమేలుతున్నాయి.. రక్తం చిందిస్తాంగానీ, మీ బెదిరింపులకు దిగం..’ అంటూ జనసేనాని నినదించారు. జనసేన అధినేతను మంగళగిరి పార్టీ కార్యాలయం వద్దనే నిర్భందించేందుకు పోలీసులు యత్నించగా, ఆయన కాలి నడకన ఇప్పటం బయల్దేరారు. పెద్ద సంఖ్యలో జనసైనికులు పవన్ కళ్యాణ్ వెంట నడవడంతో పోలీసులు వెనక్కి తగ్గారు.

దాంతో, జనసేనాని కొంత దూరం నడిచి, ఆ తర్వాత వాహనంపైకెక్కి ఇప్టపం గ్రామానికి వెళ్ళారు. రోడ్ల వెడల్పు పేరుతో కూల్చివేసిన సామాన్యుల ఇళ్ళను పరిశీలించారు జనసేనాని. దేవుళ్ళ విగ్రహాల్ని సైతం కూల్చేశారనీ, సామాన్యుల ఇళ్ళను ధ్వంసం చశారనీ, వైఎస్ రాజశేఖర్ రెడ్డి విగ్రహాన్ని మాత్రం టచ్ చేయలేదని జనసేనాని మండిపడ్డారు.